Tamos tan avezaos a perder que nos cuesta reconocer cuando ganamos. Nun ye la primer vez que lo digo y, ya aviso, nun va ser la última. Igual ye pa compensar, pero cuento que ye necesario rescamplar los llogros, individuales y colectivos, porque toi convencíu que siguimos arrastrando un ciertu complexu d’inferioridá que nun nos convién. Que nun vende, que nun atrai, que nun convence. Que mete miéu.
Gana siempre’l que tien la meyor historia que contar; el que consigue que’l so relatu de los fechos prenda na mayoría de la xente; el qu’ufierta un cambiu posible y nun queda namás na denuncia repunante de “lo mal que ta too”. Si siguimos aneciando nun discursu derrotista, basáu nel miéu a la desaparición como llingua y como pueblu, nun vamos atraer a naide. O lo que ye peor: nadie nun nos va creer cuando, de verdá, pretendamos movilizanos nuna acción concreta. ¿Conocen el cuentu del pastor mentirosu? Sí home sí: aquel rapacín que de tanto avisar de mentira “que vien el llobu”, nadie-y fizo casu cuando el llobu acabó viniendo de verdá. Pues eso.
Venti dos mil families manden a los guah.es a clase de llingua asturiana. La Universidá incorporó oficialmente al nuestru idioma nos sos planes d’estudiu pola primer vez en cuatru sieglos. La reforma del estatutu quedó en tables. Los programes de radio y televisión n’asturianu (una asignatura pendiente dende había décades) siguen enseñando que, cuando se fain les coses bien, l’audiencia respuende. El conseyu d’Europa nos da la razón y pide claridá y medides concretes. La xente enllena teatros (pagando entrada) pa ver conciertos como’l d’esta selmana d’atrás de La Bandina. Y, depués de cuarenta y seis años, recuperamos tradiciones como la de “Os Reises” en Valledor.
Lo dicho: cuando facemos les coses con xeitu, enseñamos qu’hai camín p’avanzar. Y eso ye lo que tenemos que siguir faciendo: respetar lo que ta fecho y construir enriba d’ello propuestes nueves. Facer país, convencer a unos y otros, xenerar mayoríes y quitar mieos. Empezando pol nuestru.
Tenemos dos grandes mieos a esaniciar. El primeru, como digo, el nuestru: llevamos trescientos años sintiendo que’l bable va morrer o que, directamente, ya ta muertu. Y el segundu, el de los otros: el miéu, real o ficticiu, a la imposición. A que, si de nosotros dependiera, díbemos face-yos la vida imposible a tolos castellano-falantes. La combinación d’estos dos mieos, pa más aquello, ye tremenda. Faigan cuenta: una llingua a piques de morrer (o directamente ya muerta) que necesita imponese irracionalmente a los demás pa poder salvase. Menudu panorama.
Definitivamente, tenemos coses meyores qu’enseñar.
0 comments:
Publicar un comentario en la entrada