Hailos que feliciten directamente l’añu 2010 porque cuenten qu’esti viniente 2009 nun va traer nada bueno. Y, home, yo nun veo que tengamos que ser tan pesimistes. Ye verdá que vienen tiempos complicaos y que naide sabe cuándo nin cómo vamos salir d’esta crisis. Pero, qué quieren que-yos diga, salvando les distancies, hubo tiempos peores. Ente otros, los ochenta.
Ye verdá: los años ochenta fueron peores. Y nun toi pensando nos cortes de pelo nin nes hombreres. (Anque con eso namás, bien podemos dicir que los que sobrevivimos a esa década somos quien a superar cualquier trauma). Refiérome a que, dfende’l puntu de vista económicu, los años ochenta fueron bien complicaos. Fueron los años de la reconversión. De la reconversión industrial, de les negociaciones pa entrar na Unión Europea y, sobremanera, del cambiu nes mentalidaes.
D’aquella, teníemos una estructura industrial bien poco preparada; non ya pal futuru; sinon pal pasáu. Munchos de los referentes que considerábemos inamovibles fueron cayendo ún tres de l’otru y, ensin embargo, salimos p’alantre. Pasámoslo mal. Les families que vivieron en primer persona aquellos niveles del paru de cerca del venti por cientu o la achaplante falta de perspectives pa buscar un primer empléu, nun se consolaben colos datos macroeconómicos. Pero, como digo, a lo último, fuimos quien a arreblagar años bien duros.
Agora va pasar un poco igual. Ye verdá que, al que nun-y acaben de renovar el contratu, de poco-y va valir que-y digan que’l petroléu ta baxando, igual que l’euribor, y qu’esto son nicios de que, d’equí a nun se sabe cuántos meses, la recesión va remitir. Suena demasiao abstracto. Y nun-y falta razón. Vamos tardar en ver cómo se vuelve xenerar empléu y cómo l’actividá económica vuelve a los niveles de primero. Pero tamién ye verdá que, pa la mayoría de la xente, les coses siguen igual. Los salarios nun baxaron y les coses nun son más cares. Munches tan baxando de preciu. (Nun hai más que ver les pescaderíes o cómo tan les rebaxes).
Hai una gran parte de sicolóxico en toa esta crisis. La xente gasta menos y aforra más. Y eso, que nun ye lo meyor pa reactivar los movimientos económicos, ye, por contra, una garantía de futuru. En dalgún momentu, toes eses perres van acabar volviendo a l’actividá financiera y vamos poder encarar los nuevos tiempos con más solvencia. Por eso digo que nun hai que ser pesimistes. Salimos de crisis más fondes y peores. Y vamos salir d’esta. Nun va ser gratis. Non. Pero cuento que, como sociedá, tamos meyor preparaos pa los cambios qu’hai venti años. Por too ello, ánimu y feliz 2009.
0 comments:
Publicar un comentario en la entrada