Caminos nuevos pal CAO

La xunta pola defensa de la llingua asturiana acaba cumplir venticinco años. Hai que ver cómo pasa’l tiempu. La verdá ye que nestos cinco lustros abulta muncho lo que se tien trabayao, avanzao y conseguío. Por contra, la tentación de caer nel derrotismu y asumir que tolo fecho nun valió pa nada ye grande. Y ello por una razón: l’oxetivu principal, el símbolu final, la cuestión cimera, tovía nun se tien algamao.
Toi refiriéndome, evidentemente a la oficialidá y, como ye bien conocío que l’asturianu tovía nun dispón d’esi estatus xurídicu, la tentación, como digo, de pensar que siguimos igual qu’hai venticinco años ye grande.
Pero non. Nun tamos igual qu’hai venticinco años. Cambiaron les circunstancies, cambiamos nosotros y les estratexes tienen que cambiar. La idea sigue siendo la mesma: consiguir la normalización del nuestru idioma. Tenemos que sacar al asturianu d’esi estatus de dialectu menor, de llingua imperfecta y atrasada, d’amestao d’andar per casa y convirtilu nun patrimoniu de futuru, nuna seña d’identidá de la que nos sintir arguyosos y, en definitiva, nun instrumentu de comunicación nel que poder vivir y trabayar con comodidá.
Pa facer eso tenemos que convencer a muncha xente. Tenemos qu’eliminar complexos y mieos. Y tenemos qu’enseñar a tol mundu que la normalización del asturianu nun va contra naide. Naide tien por qué sintise amenazáu porque a naide se-y va imponer nada como nun seya’l respetu a los demás. Nun va ser fácil. Sabémoslo bien. La sensación de topar contra una muria ye grande y, por eso mesmo, tenemos qu’escoyer con munchu procuru les estratexes a siguir.
Nel casu concretu de la oficialidá tamos énte un retu, fundamentalmente, políticu. Y ehí les matemátiques son fundamentales. Necesitamos la complicidá del PSOE y del PP porque con Izquierda Xunida y los partíos asturianos nun nos val. Y, probablemente esta necesidá ye ún de los mayores retos y de les mayores contradicciones del CAO: nun somos a vivir colos partíos mayoritarios pero tampoco podemos avanzar ensin ellos.
Tenemos qu’enseñar que nel CAO pueden tar a gustu los d’izquierdes y los de dereches, los nacionalistes y los non nacionalistes, los nuevos y los más veteranos. Tenemos que siguir trabayando na cai y na movilización social, pero tamién tenemos qu’argumentar nos despachos y nos gabinetes. Tenemos que contar colos sindicatos pero, sobremanera, tenemos que facer lo propio colos empresarios. Porque unos y otros son imprescindibles y, por eso mesmo, tenemos que mirar más pa los que, hasta agora, miramos menos. Y, en fin, pa terminar, y por dicilo en palabres que tol mundu pue entender, tenemos que poner más la corbata.