Más diplomacia y más presión

La diplomacia nun tien mui buena prensa. Bien de veces confúndese col cinismu o, tolo más, cola mentira elegante. “Les coses son lo que son y lo único que faen los diplomáticos ye anubriles embaxu una montonera de palabres engañoses; vamos, igual que los malos feriantes y los vendedores de remedios milagrosos; por eso, énte los que nun acaben d’entender los nuestros argumentos, lo único que podemos facer ye aumentar la presión: esa ye la única manera de convencer a los que nos nieguen los derechos”.

Bueno. Efectivamente, la presión ye una ferramienta imprescindible pa cualquier reconocimientu de derechos civiles. La movilización, la pelea, la presión social forma parte de les estratexes básiques en cualquier reivindicación cívica. Ye más; nel casu del reconocimientu xurídicu del nuestru idioma (ello ye, de la oficialidá) ye casi l’únicu camín que nos queda sigún dalgunes declaraciones d’unos y otros: “lo del bable ye un inventu”, “sois cuatru gatos”, “falta demanda social”, “eso nun da votos”...
Si aceptamos esto, nun nos queda otro que xugar a la presión social. Y, si paramos a pensar un poco, tenemos que nos decatar que la presión (lo mesmo na física que na vida) nun ye otra cosa que’l resultáu de dividir la fuerza qu’aplicamos ente la superficie qu’utilizamos p’aplicala. Los carpinteros sábenlo bien: a igual fuerza pero menos superficie, más presión (ello ye: a igual mazazu, contra más fina ye la punta más s’espeta na madera). O, si se prefier, a igual superficie pero más fuerza, más presión (si la punta ye la mesma, contra más fuerte ye’l mazazu, más s’espeta na madera).
Hai que dar ónde duel. Hai que ser finu. Y nun hai por qué facer trampa. Si la rocea que queremos combatir ye que nun somos una minoría repunante, tenemos qu’enseñar la xente que ta con nós; lo paisanos que somos en cantidá y en cálida. Por eso empondero bien la campaña “doi la cara pola oficialidá”. Porque tolo que seya sumar ye positivo pa nosotros y val pa restar al contrariu. Porque tolo que seya añadir cares célebres val pa neutralizar mieos. Y porque tolo que seya salir del anonimatu val pa incorporar aire fresco. Por contra, por tolo qu’acabo de dicir, nun me termina de convencer la estratexa de siguir persiguiendo al presidente colo de la “pita pola oficialidá”. Porque cansa. Porque despierta rocees. Y porque dexa mal a gustu a tolos que participen n’ello.
Ta mui claro qu’esto ye una opinión personal y ta más claro tovía que pueo tar enquivocáu. Pero ¿soi más inocente por pensar esto? ¿O soi más listu y busco más eficacia? Nun sé.