Ganó la moderación

Efectivamente, cuento que nes recientes elecciones de Galicia y el País Vascu ganó la moderación. Yo, polo menos, véolo asina. Nel casu gallegu, la victoria de la derecha nun pue amatagase. Ye incontestable: mayoría absoluta arrancada dende la oposición. El pueblu gallegu faló y faló claro. Por eso nun tien que nos estrañar que Touriño, el candidatu socialista, dimitiera. Porque nun ye lo mesmo perder les elecciones como aspirante que como presidente. Ye un poco como los penaltis: que nun los para’l porteru, fállalos el delanteru.
Eso sí, la so renuncia ye un xestu de paisanu que lu honra. Y la victoria de Feijoo ye un trunfu qu’abre unes posibilidaes de les que tendríen qu’aprender los sos homólogos d’esti lláu del Eo.
Nel casu vascu, les coses nun son tan evidentes. Pero ta claro que va haber cambios. L’arinmética parlamentaria ye cruel n’esti sentíu. El PNV ye’l partíu más votáu. Sí. Pero nun tien más qu’un aliáu posible pa gobernar: el PSE. Por contra, el PSE, que quedó segundu, tien dos posibilidaes p’apautar. Una, col mencionáu PNV. Y dos, colo que podríemos denominar “los constitucionalistes”. Ello ye, axuntando los sos escaños a los del PP más UpyD.
Lo sorprendente ye que n’esta arinmética parlamentaria hai una hipótesis que, n’otres circunstancies podía ser normal, pero que nel casu vascu, directamente, nun se contempla. Nun s’analiza, nun se ve, ye imposible. Refiérome a una alianza de la derecha ente’l PNV y el PP. Como digo, n’otres sociedaes yera lo más normal. La izquierda ye a facelo ¿Por qué la derecha nel País Vascu non? Pues porque non. Porque nun se fizo nunca. Porque nun hai peor cuña que la de la mesma madera y porque lo que nun pue ser nun pue ser y amás ye imposible. Y, en fín, esta imposibilidá, esta necedá d’unos y otros, ye lo que va pone-y bien difícil al PNV siguir gobernando.
Esa ye la principal diferencia agora ente los dos candidatos a lehendakari: Patxi López y Ibarretxe. El primeru pue apautar dos clases de mayoría de gobiernu. El segundu namás una. Y esta ye tamién la gran diferencia ente la situación actual y la que se dio años atrás cuando l’aspirante constitucionalista con más posibilidaes yera Mayor Oreja: que Patxi López pue apautar dos mayoríes y Mayor Oreja namás una.
La flexibilidá, la moderación, el posibilismu podríemos dicir. Eso ye lo qu’apoyaron mayoritariamente los electores de Galicia y Euskadi. Xente que seya a dar soluciones envede problemes. Pies calientes y cabeza frío. Dígolo por ver si aplicamos el cuentu.