La derecha podía entendese

Hai coses en política que, por ser tan evidentes, nun terminamos de ver. Una d’elles, na mio opinión, ye la dificultá que tien la derecha española pa entendese cola derecha española. Y hasta que nun seya quien a facelo va tener mui difícil gobernar. Imposible, non; pero mui complicao, sí. Voi intentar desplicalo.

N’estos años d’atrás, la derecha española enseñó una capacidá reseñable pa integrar ideoloxíes estremaes y facer con elles un viaxe al centru. Dende los más reaccionarios hasta los más centristes, tol espectru ideolóxicu, del PSOE pa esa parte, convive nun mesmu proyectu políticu. Conservadores, demócrata-cristianos, lliberales y demás fueron a superar distintes fórmules de coalición y concurrencia p’acabar integrándose nunes sigles namás. Y, cuidáu, que nun me refiero sólo al PP. Porque nel conceptu de derecha española incluyo tamién a la derecha vasca del PNV, a la catalana de CiU, a l’aragonesa del PAR, a l’asturiana d’UA, a la cántabra del PRC y a toles demás. Na so circunscripción, cada una d’elles, ye a preséntase con unes sigles namás; eso ye lo que tienen en común.

El viaxe ideolóxicu, el viaxe al centru, dende esti puntu de vista, ya ta fechu. Pero el viaxe territorial, el viaxe a la periferia, non. Y, asina, la mesma derecha que ye quien a xuntase ideoloxicamente, nun ye quien a entender sensibilidaes o identidaes territoriales distintes. La ideoloxía nun separa; la identidá, sí. Y, amás, ye a facelo d’una manera radical, insalvable, imposible d’arreblagar.

Los efectos de lo que digo tan a la vista: el PP y el PNV, dos partíos de dereches, tan dispuestos a pactar col PSOE, un partíu d’izquierdes, pa formar gobiernu pero nun consideren, nin como hipótesis de trabayu, pactar ente ellos. Nin pa pañar duros. ¿O digo mentira? Pero ye que en Cataluña pasa igual: PP y CiU prefieren más entendese col PSOE qu’ente ellos. Y fírmenlo énte notariu pa que conste. Increíble. ¿Y col PRC, el PAR, UM, UPL, UPN y demás? En fin.

Y, entós, ¿Afecta esto a Asturies? Por descontao que sí. Piénsenlo un poco: la única vez que la derecha algamó’l poder n’esti país, fízolo gracies a los asturianistes y a la suerte. Y rompió al poco, non por ideoloxía; sinon por nun ser a entender la tensión de poder Madrid-Uviéu. O centru-periferia. O Asturies-España, como prefieran.
Por eso, repito, na mio opinión, n’Asturies, igual que n’España, hasta que la derecha nun s’entienda cola derecha va tenelo mui complicao pa gobernar. Y, bueno, ye too ponese.

.