La esquierda tamién pue entendese

Esta selmana, el diputáu d’Izquierda Xunida – Bloque por Asturies – Los Verdes, Francisco García Valledor, pidió disolver el so partíu pa entamar otru qu’axunte a tola izquierda alternativa al PSOE”. Una fuerza política nueva que definió como “d’izquierdes, asturianista, ecoloxista, republicana y altermundista” y de la que, sigún dixo, invitaba formar parte a otres fuerces extraparlamentaries. En concretu, Unidá Nacionalista Asturiana y Izquierda Republicana.

De momentu, el so llamamientu nun tuvo muncho aquello. El portavoz de Los Verdes ya-y retrucó que nun taba mui pol llabor; que taba bien a gustu colo qu’había. Otra manera, dende la UNA respondiéron-y; si me lo permiten, un aquello sobraos; diciendo-y que "yá existía una fuerza asturiana, ecoloxista y d’izquierdes: la UNA”. (¿Por qué seremos tan gayasperos los asturianos? En fin, sigo). Y, pa rematar, dende’l PSOE, estrañáronse que un diputáu que formó parte d’un gobiernu y que ta apoyando otru gobiernu del mesmu signu pida, dende’l so escañu, la disolución del so partíu pa entamar otru.

Panorama enguedeyáu el de la izquierda. Y difícil decisión la que va tener que tomar Valledor cualquier selmana d’estes. Nun ta a gustu na so coalición, pero tampoco ta a gustu afuera. Y ye una pena porque, nuna estructura tan anquilosada como la nuestra, nun sobra xente qu’aporte aires nuevos.

Francisco García Valledor vien animando la vida política asturiana d’un tiempu a esta parte. El so compromisu asturianista y el so dinamismu mediáticu dieron-y una proyección evidente na anterior alministración. Una proyección que lu apartó n’esta segunda lexislatura y que, como digo, pon-y problemes pa terminar d’atopar el so espaciu propiu. Y ye que’l problema, el gran problema que tien la izquierda alternativa al PSOE, ye que nun puede gobernar ensin los socialistes, pero, a lo que se ve, tamién-y resulta mui difícil facelo con ellos.

Una fuerza asturiana, ecoloxista y d’izquierdes (la UNA, el Bloque, la suma de les dos o denguna d’elles) podía trasformase nun sitiu onde bien de xente tuviera a gustu. Pero, na mio opinión, casi too pasaría por ser a responder a un par de preguntes bien cencielles: Una ¿Diba apoyar usté un gobiernu socialista que nun apoyare lo qu’usté considera derechos fundamentales (por exemplu, la oficialidá)? Y dos, ¿Diba dexar entós que gobernare una derecha que sí apoyare esos derechos fundamentales?

De cómo se respuenda a estes preguntes, pamidea, depende casi tolo demás. Y ye que, na mio opinión, la verdadera clave pa que’l PSOE dependa más d’esa izquierda (nueva o vieya) ta precisamente en qu’esa izquierda nun dependa tanto del PSOE.