Namás un tres por cientu.

En marzu de 1992, Ovidio Blanco, arquitectu del Ayuntamientu de Xixón compró un práu, la llosina, por un millón doscientes cincuenta mil pesetes. A los seis años vendiola a los mesmos a los que-yos la compró por un millón cuatrocientes mil. Bueno, hasta ehí más o menos normal, quitante qu’esta operación parez nun tener muncho aquello. Que un arquitectu que trabaya pal Conceyu ande comprando y vendiendo finques a les empreses constructores nun abulta elegante. Suena a especulación. Pero siguimos; porque la cosa nun quedó n’eso.

Seis años depués, nel 2004, el mesmu arquitectu volvió comprar el mesmu práu, la llosina, menos de tres mil metros cuadraos, por venti mil cuatrocientos euros; ello ye, por tres millones cuatrocientes mil pesetes. Ello ye, a mil y picu pesetes el metru. Barato, pa qué nos vamos engañar. Y, atención, qu’equí llega lo bueno, porque, a los dos años el señor Ovidio Blanco, cuarenta díes depués de tener dexao de trabayar pal ayuntamientu, volvió vender la ya famosa llosina, a los mesmos a los que-yos la compró esta segunda vuelta, por namás y na menos que seiscientos diecisiete mil euros: más de cien millones de pesetes. Caro, mui caro.

En fín, comprar barato y vender caro, lo que se diz una operación de compra-venta curiosuca. En concretu, tan curiosuca como qu’equí tamos falando, si me permiten la ironía, de namás un ruin tres por cientu. Ello ye, comprar en tres millones y vender en cien. Eso ye lo que fizo’l señor Ovidio Blanco. ¿Qué se pue dicir? Pues que poques veces la expresión “pelotazu” tuvo meyor traducción.

A mi, la verdá, de lo que más me plasma d’esta cuestión ye lo descarao que resulta. La falta de moderación, de prudencia y de buen gustu de los protagonistes. Un arquitectu municipal, una empresa constructora, unos terrenos recalificaos, una fuerte opsición vecinal, un Ayuntamientu que desconoz el tema... Esti asuntu tien tolos elementos pa nun pasar desapercibíu. Ye fácil d’entender y más fácil d’enseñar; y, por eso mesmo, al señor Blanco nun-y tinía qu’estrañar tenese convertío, en palabres suyes, en “víctima d’un escarniu”. Ye lo menos que-y pue pasar.

Porque estes coses pasen. Somos humanos. Por eso enquivocámonos y por eso tenemos que tener mecanismos de seguridá pa prevenir accidentes. Pues polo mesmo, porque somos humanos y tenemos tentaciones, hemos disponer de mecanismos de seguridá pa prevenir enriquecimientos fraudulentos. Y si se dan, como ye’l casu, tenemos que los esclariar, definir bien les culpes, facer porque nun chisquen a los inocentes y, sobremanera, asegurar lo más posible que nun se vuelvan repitir.