Falar de perres suel considerase de mal gustu. Y más si lo fai un empresariu, como ye’l casu. Opinar si una persona gana más o menos de la cuenta ye un tarrén esnidiosu. Ye difícil ponese d’alcuerdu. Y nun toi refiriéndome agora a la parte relativa del asuntu. A si gano muncho o poco. Refiérome a los datos fríos y, presuntamente, incontestables: gano tanto al añu, al céntimu. Efectivamente, podría parecer que, al falar d’euros, de númberos; seyan munchos o pocos; les cantidaes resultantes nun tendríen que se discutir. En teoría, les matemátiques son una ciencia exacta y dos más dos tendríen que ser cuatro. Pero nun ye asina.
¿Cuánto ganen los nuestros médicos y los profesores? Ana Rosa Migoya, la conseyera d’alministraciones públiques, declaró esti día que les retribuciones de los facultativos y personal sanitariu dependientes de la nuestra alministración tiníen medrao un cuarenta y siete por cientu ente’l 2002 y el 2008. Que los salarios del personal non sanitariu del serviciu de salú del principáu tiníen aumentao otru cuarenta y cinco por cientu nel mesmu periodu. Y que, nel casu de los docentes, l’incrementu yera d’un treinta y ochu por cientu. N’entrambos los tres casos, concluyó la conseyera, fueron incrementos retributivos mui superiores a los del restu d’empleaos públicos de l’alministración asturiana.
La repuesta de los colectivos aludíos foi rotunda, radical, mui dura: “la conseyera miente”. Ye más, sigún ellos, “la conseyera manipula les cifres pa ponenos enfrente a la opinión pública y pa prender fuéu a los conflictos en cuenta solucionalos”. Y concluyen afirmando que, al enseñar estos datos, lo que busca la conseyera ye “una declaración de guerra”.
Mala cosa. Si nun somos apautar les cifres de partida mal vamos entamar una solución nos oxetivos de llegada. Ye verdá que la lexislación llaboral ye tan enrebesada que cuesta atopar una referencia na qu’entendese de primeres. Unos falen de brutu anual, otros arréglense meyor col líquidu mensual, pero, en cualquier casu, si lo que tamos ye enseñando una comparativa y falando de porcentaxes, por munches vueltes que-y deamos, a lo último tendremos qu’algamar una cantidá única que nos valga de puntu de partida.
Más qu’entrar nuna guerra de cifres, los sindicatos aludíos podríen moyase y enseñar cual ye, sigún ellos, l’incrementu salarial qu’experimentaron los sos representaos, médicos y profesores, n’estos últimos seis años. Porque, efectivamente, la opinión pública entiende mal que, n’estos tiempos onde’l paru medra y les empreses cierren, los nuestros impuestos sirvan pa pagar incrementos salariales que los beneficiarios dicen nun percibir. ¿O qué ye que se pierden pel camín?
0 comments:
Publicar un comentario en la entrada