Lo que pidimos a los nuestros políticos

Ye difícil ser cargu públicu y asturianista. De mano, hai que navegar en dos agües mui estremaes. Uno, tar a bien colos compañeros de partíu. Y, dos, saber apoyase nuna base social, como poco, complicaduca. En parte, esti problema tienlu cualquier responsable públicu. La política ye l’arte de lo posible y l’éxitu depende de ser a equilibrar les espectatives de los votantes cola realidá de l’alministración. Nun ye fácil y, a diferencia de la mayoría, yo sigo contando que muncho de la culpa ye nuestra, de los votantes.

Falamos mui mal de los nuestros políticos, dicimos que nun valen pa nada, y declaramos que nun esperamos gran cosa d’ellos. Pero ye mentira. La verdá ye qu’esperamos que nos arreglen los problemes; que nos construyan les carreteres, los hospitales y los polideportivos que fain falta; y que nos proporcionen los puestos de trabayu mínimos pa nun tener qu’emigrar. Pero nun queremos pagar más impuestos. (A ver, nun nos preocupa que los paguen los otros; pero nosotros non, que ya pagamos bastante). Tampoco queremos que, por culpa la carretera, nos expropien el práu. Y siempre andamos buscando vericuetos pa escapar del control alministrativu ¿O ye que pagamos les multes de tráficu con entusiasmu cívicu?.
Si eso pasa con cualquier colectivu humanu, profesional o social ¿Cómo nun va pasar col asturianismu? Tenemos cargos publicos asturianistes en tol espectru políticu. Y de toos ellos dicimos lo mesmo: nun fain bastante. Nunca fain bastante.

Cualquier asturianista ye quien a citar media docena de destacaos dirixentes socialistes, populares o izquierdistes, que nun terminen de dar un puñetazu na mesa pa enfrentase a la dirección del so partíu. ¿Por qué callen tanto? dicimos ¿Por qué nun terminen de salir del armariu? Bueno, yo cuento que la pregunta nun tien repuesta porque ta mal plantiada. Uno, porque ya tan afuera del armariu; por eso sabemos que son asturianistes. Dos, porque ya se tan enfrentando a la política del so partíu simplemente siendo asturianistes. Y tres, porque pa ganar n’esi enfrentamientu tendríen que ser mayoría. Y nun lo son. Y nun lo son porque nosotros, los ciudadanos, nun terminamos d’enseña-yos el nuestru apoyu.

Por eso cuento que los que tendríemos que salir del armariu somos nosotros, los votantes. Ser más sinceros con nosotros mesmos y empezar a dicir a los nuestros cargos públicos que nun se tienen qu’enfrentar a los sos partíos. Sinon tolo contrario. Eso ye lo que pienso; que como políticos que son, tienen que trabayar más dientru, tienen que convencer a contra más meyor, y tienen qu’algamar más poder. Esa ye la so obligación.