La Sindicatura de Cuentes acaba emitir un informe criticando la nuestra alministración. Perfecto: esi ye’l so llabor. Esti organismu, angüañu dirixíu pol discretu y eficaz Avelino Viejo, creóse hai cinco años pa mirar por cómo la nuestra alministración pública cumplía la llei; un principiu básicu del sistema de repartu de poderes. Bueno, pues, nel cumplimientu de les sos funciones, la Sindicatura considera de “llegalidá dudoso” que p’agosto del 2001, el nuestru gobiernu nun tuviera sacao a concursu la construcción de diez xeriátricos p’adxudica-ylos, tolos diez, a la constructora Sedes. Unos contratos polos que la constructora ingresó quince millones d’euros.
La constructora Sedes pertenez nun 60 % al nuestru gobiernu, Cajastur tien otru 39,86 % y el restu pertenez a accionistes minoritarios. Nun ye, polo tanto, una empresa pública cien por cien. Y esi ye, sigún la Sindicatura, motivu suficiente pa nun almitir una adxudicación directa; un sistema que’l nuestru gobiernu vien usando cola mencionada Sedes cuando quier executar construcciones d’urxencia. En palabres del propiu Avelino Viejo: “Esti tipu de soluciones son una práctica mui discutío y contra les que hai bien de sentencies. Detrás d’esti conveniu hai una adxudicación a déu y eso namás ye admisible cuando l’alministración controla’l cien por cien de les acciones. Equí, por contra, tamos énte un contratu d’obra y, polo tanto, tinía que se tener adxudicao colos procedimientos de contratación público que permitieren la concurrencia d’otres empreses”. En resume, y tamién sigún les propies palabres del Síndicu mayor: “Una operación que nun s’atien a la llegalidá pero na que tampoco nun s’aprecien indicios de delitu contable”.
Hasta equí lo normal; un sistema que funciona precisamente pa ser a enseñar les coses que nun funcionen. Tendríemos que nos felicitar por disponer de recursos asina. Pero ¿quieren saber cómo fueron les reacciones de los protagonistes y de los nuestros parlamentarios énte too esto? Na mio opinión, llamentables. De mano, el xerente de la constructora Sedes riose d’ellos por perder el tiempu echando más de día y mediu nuna factura de dos euros de la vacuna’l perru y acusolos d’ineficaces por tar empapizaos con tola documentación que-yos remitieron. Pela so parte, el grupu parlamentariu socialista afirmó que l’informe contenía “demasiaes afirmaciones subxetives porque l’auditor tinía un xuicicu previu y buscó les conclusiones pa llegar hasta onde quería llegar”. Y, pa rematar la xugada, el grupu popular aseguró que “lo que dicía l’informe yera gravísimo” y, contradiciendo’l propiu informe, remarcaben que “se tinía vulnerao la llei y qu’eso namás pasaba nes republiques bananeres”.
Y en cuenta d’aprender del informe dedicámonos a matar al recaderu. Mala cosa.
0 comments:
Publicar un comentario en la entrada