Gracies a l’Asociación de Sidreríes de la Cai Gascona “El Bulevar de la Sidra” por teneme invitao a dar esti pregón. Cuento tar al altor de les circunstancies y nun defraudar a naide. Anque eso ye bien complicao porque, ya se sabe, lo que gusta a unos igual nun gusta a los otros y pue pasame como aquel paisanu que, en volviendo a casa depués de la preba de la sidra del añu pasáu, al velu cómo llegaba, dixo-y la fía:
- Ai, papa, vaya borrachera más curiosa que trais.
- ¡A que sí! Pues ya verás como tu madre tovía-y pon pegues.
Bueno, pues cuento que a min nun me pongais pegues.
Lo que quería, por contra, yera contavos una historia. Una historia d’un grupu d’asturianos qu’hai años decidió que nun pagaba la pena siguir llaméntándose de lo dura que yera la vida. Qu’entamaron construir el so propiu futuru abriéndose más al exterior, conquistando mercaos nuevos y atrayendo visitantes. Porque, y eso yera lo principal, ya que queríen tar n’Europa, necesitáben qu’Europa tuviera equí y los conociera.
Nun yera un proyectu fácil. D’aquella, España entera tinía vivío demasiaos años ensin mirar al exterior. O mirando namás que pal sur, porque, visto dende afuera, parecía que toos tiníemos que ser andaluces. Esa yera la imaxe tópica de la España d’aquel tiempu. Yera verdá que, dende había unos años, los padres d’aquellos asturianos tiníen conquistao un autogobiernu y unes llibertaes con bien d’esfuerzu. Pero l’amenaza d’otra involución taba ehí.
En cualquier casu, aquellos asturianos tiníen les idees mui clares. Y entamaron abrir un camín qu’aportara a les nuestres tierres bien de visitantes pa que sintieren el nuestru país como propiu. Entamáronlo y fixéronlo. Empezaron predicando col exemplu: calzaron les sandalies y fixeron camín. Y, asina, dieron aniciu a una pelegrinación qu’empezaba n’Europa, entraba pel Pirinéu y llegaba hasta Finsiterre. Y ye que, como munchos ya sospecháis, toi refiriéndome al grupu d’asturianos que, nos tiempos del Reinu d’Asturies, dieron empiezu al Camín de Santiago, al Camín de Compostela.
La so apuesta salió bien. Y la so collecha siguimos pañándola angüañu. Esta mesma cai onde tamos agora forma parte d’esa ruta irrepetible. Y el so nome; “La Gascona”; remembra la gran cantidá de franceses del sur, de la Gascuña, que l’anduvieron. Nun ye la única. La cai “La Rúa”, bien cerca d’equí, debe-y tamién el nome a la manera francesa de dicir cai; ello ye, rue. Y por eso, en cierta manera, llamar a esta ruta “El Bulevar de la Sidra” ye otra manera, casual y inconsciente, d’homenaxear esa influencia francesa y europea nes nuestres ciudaes.
El camín de Santiago ye una creación de la que los asturianos tenemos que tar arguyosos. Fuimos quien, hai doce sieglos, a poner en marcha un proyectu imposible. Fuimos quien a defender la nuestra identidá abriéndonos al exterior. Y fuimos quien a facer que bien de forasteros sintieren esta tierra como propia.
Agora, mil doscientos años depués, tamién son tiempos duros. Y agora, los asturianos, tenemos que volver a ser quien a apostar polo nuestro, pola nuestra identidá y pola nuestra forma de ser. Tenemos que ser quien a entamar proyectos ambiciosos que nos asitien nun mundu cada vuelta más competitivu. Y tenemos que ser quien a facer que tolos forasteros sientan esta tierra como la d’ellos.
Nun ye imposible. Podemos facelo. Ficímoslo nel pasáu y podemos volver facelo agora. Sí, podemos. Claro que podemos. “Yes we can”, diz Obama. “Somos quien”, dicimos nosotros.
Y esta décima preba de la sidra del Bulevar de Gascona ye una pequeña amuesa d’ello. Equí, onde parecía imposible, tolos años somos a xuntanos más y más xente pa celebrar otra collecha de la nuestra bebida. Pa vivir y disfrutar la nuestra identidá. Pa que la manera de sentir de los nuestros padres pase a los nuestros fíos. Y pa facer que los forasteros s’afayen equí como en tierra propia. Porque esi ye l’espíritu: esta casa ye nuestra y, por eso mesmo, ye la vuestra.
Y, por eso, a los que venís de Francia: “Bienvenues a la rue Gasconne et merci beaucoup pour etre ici”.
A los que venís de tierres de fala catalana: “Benvinguts i moltes gracies por ser aquí”.
A los que venís del País Vascu o Navarra: “Ongi etorri eta eskerrik asko”.
A los que venís de toda España y d’Hispanoamérica: “Bienvenidos, gracias y estais en vuestra casa”.
A los que venís de les isles britániques, d’Europa o de Norteamérica: “Welcome and thak you to be here”.
A los que venís de Galicia y Portugal: “Benvidos e muito obrigado”.
A los que venís del Magreb y de tierres d’Arabia: “Assalam-o-alaikum, shucram”.
A los que venís del África central: “Karibu, Ahsante”.
A los que venís de la China: “Ni hao, xie xie”.
Y a tol mundu: “Bienllegaos, afayaivos y que vos preste”.
Y vamos dexanos ya de pregones y de saludos y vamos dir terminando pa pasar a prebar la sidra, que ye lo qu’importa. Que hai un tiempu pa cada cosa y una cosa pa cada tiempu. Nun vaiga pasanos como aquel otru paisanu qu’en volviendo d’otra preba de la sidra y vienda l’enfile tan curiosu que traía, dixo-y la muyer:
- Ai, paisanu, vas enterrame viva.
- Si, home sí- dixo él- que toi yo buenu como pa garrar la pala agora.
Asina que, bebei con moderación, disfruai d’esta mañana d’abril y queda inagurada esta décima preba de la primer sidra de la temporada 2009.
Haiga salú y gracies.
Uviéu, 19 d’abril de 2009
0 comments:
Publicar un comentario en la entrada