Cuestanos falar d’Europa. Nun somos a ello. Estes elecciones nun se van debatir nin decidir en clave europea. Los polacos van votar en clave interna; non pensando nel conxuntu de la Unión. Igual que los austríacos o los asturianos. Ye más; los asturianos vamos votar en clave española, lo que termina d’enguedeyalo too porque tamién van votar en clave española los catalanes, anque nel casu de votar al PSOE, hai dellos nomes que nun aparecen na so llista (Magdalena Alvarez o Ramón Jáuregui) pero van salir igual. Un enguedeyu.
En cualquier casu, vamos votar más por razones polítiques que reales. Nun terminamos d’entender qué ye lo que fai esi parlamentu européu que vamos escoyer y echamos la culpa a los demás d’esi desinterés. Pero yo nun tengo nada claro que seya responsabilidá de los políticos. Si la campaña electoral se centrara n’analizar namás lo que van facer los distintos grupos parlamentarios europeos nos años vinientes, igual l’apatía y l’abstención yeren tovía mayores.
Que d’esi parlamentu nun se desprenda un gobiernu européu con verdaderu poder executivu nun ayuda a da-y conteníu a estes elecciones. Y que’l presidente de la Comisión europea; el portugués Durao Barroso; tenga’l consensu de populares y socialistes tampoco ayuda a da-y emoción a la cuestión. Los europeos nun votamos a un candidatu únicu, nin siquiera a un proyectu únicu, y eso de nun poder pone-y cara a la papeleta, quita-y sentimientu al procesu.
Con too y con ello, hai asuntos que se debaten n’Europa qu’afecten directamente a les nuestres vides cotidianes. Asuntos que podríen provocar alderiques interesantes porque, a lo último, escuenden presupuestos ideolóxicos bien estremaos. Voi poner un par d’exemplos. Ún d’ellos ye’l de los vuelos baratos. L’aparición de compañíes aeries de baxu coste permitió a munchos europeos; asturianos incluyíos; viaxar a precios nunca vistos. Pero, na otra cara la moneda, afectó de manera negativa a les cuentes d’explotación de munches compañíes aeries, vamos dicir, tradicionales. Velequí un debate clásicu: ¿Qué interés ye prioritariu, el de les grandes compañíes o el de los usuarios anónimos? O, dicho d’otra manera: ¿Cómo tenemos qu’intervenir, restrinxendo’l tráficu aeriu o lliberalizándolu?
El parlamentu européu, hai años, decidiose pola lliberalización n’esti campu. Y el resultáu ye’l que tamos viendo. La solución nun ye perfecta y, sobremanera, nun ye conveniente pa tol mundu. Pero lexislar ye eso: decidir énte distintes opciones, denguna perfecta. Y apunto’l segundu exemplu: el del lleche. ¿Por qué nun lliberalizamos tamién el mercáu llecheru? ¿Por qué nun hai ya cuotes aeries y siguimos enfotaos nes cuotes llecheres? Esos, esos son los debates que me prestaba sentir n’esta campaña.
0 comments:
Publicar un comentario en la entrada