La primer guerra mundial, de 1914 a 1918, acabó con nueve millones de muertos. La pandemia de gripe española produció, naquellos mesmos años, más de cuarenta millones de fallecimientos. Cuatro y picu veces más. Con bastante menos repercusión mediática y, sigún los teóricos, muncha menos trescendencia histórica. La guerra mundial enllenó llibros, cambió fronteres y quitó gobiernos. La gripe española mató xente, arruinó cases y destrozó families. Pero nun pasó d’ehí. Y precisamente por eso, porque nun rescampla tanto pero ye real, l’alarma social énte les epidemies ta más que xustificada.
Eso nun quier dicir que tengamos que caer nel sensacionalismu. La prudencia ye importante. El sentíu común, tamién. Y la manera d’evitar la histeria colectiva; que, esa sí, nunca ayuda a nada; nun consiste n’anubrir la realidá; sinon en ser a informar d’ella de la manera más responsable posible: cuáles son los númberos precisos, qué ye lo que convién facer, qué previsiones hai de futuru... Aparte, tenemos que consiguir que nun paguen xustos por pecadores. N’esti casu, por dicir, los gochos; que, con too y dar nome a la enfermedá, parez ser que nun tienen más participación n’esta gripe y na so tresmisión que la que puen tener les aves o nosotros, los humanos. Va ser difícil. L’asociación d’idees ye inmediata y ye probable que baxe’l consumu de carne de gochu; cosa inxustificada y desproporcionada, ye verdá. Pero’l miéu ye llibre y l’únicu remediu a los malentendíos consiste en más y meyor información.
La gripe española llamose asina por culpa la censura. Nun nació n’España. Nin siquiera n’Europa. El biltu vieno d’Estaos Uníos y España nin siquiera foi’l puertu européu d’entrada. Pero como España, al nun participar n’aquella primer guerra mundial, yera ún de los pocos países occidentales que nun tenía censura militar, la mayor parte de la información d’esa pandemia acabó viniendo de los periódicos españoles. Y, ya se sabe, matose al recaderu, una vieya afición. N’esti casu, bautizose al mal col nome del recaderu, una variante más moderna pero igual de sangrina.
Angüañu les coses son d’otra manera. Nun hai censura, polo menos militar, y la información cuerre de manera global. Igual que los virus, los ciudadanos y los bilordios, tamién ye verdá. Pero, con too y con ello, tamos meyor preparaos que nunca. La organización Mundial de la Salú lleva previniendo d’una pandemia mundial dende l’añu 2.000 y l’amenaza; vamos dicir, fallida; de la gripe aviar valió p’activar mecanismos de prevención. Toca aplicar sentíu común, evitar situaciones de riesgu y recibir y tresmitir la información más precisa y sensata; esi ye’l meyor remediu.
0 comments:
Publicar un comentario en la entrada