Quién nos lo diba dicir. Ya nun ye nacionalista nin el lehendakari vascu. Parez mentira cómo tan cambiando les coses. Nin en Galicia, nin n’Euskadi, nin en Cataluña; les tres nacionalidaes llamaes históriques; gobiernen partíos nacionalistes: nin BNG, nin PNV, nin CiU. Depués de trenta años hai que ver cómo se tresforma’l mapa políticu. Pa buscar presidentes autonómicos de militancia propia tenemos que mirar pa Canaries, Navarra o Cantabria. Y nun hai más.
Nes catorce autonomíes restantes, más Ceuta y Melilla, gobierna’l PSOE o el PP. Incluyendo la famosa terna del Galeuska; ello ye, la formada por Galicia, Euskadi y Cataluña. Angüañu la terna diba ser dalgo asina como CaNaCa; ello ye, la formada por Canaries, Navarra y Cantabria. Suena peor, pero ye lo qu’hai: Coalición Canaria, Unión del Pueblo Navarro y Partido Regionalista de Cantabria.
Nun sé si estos cambios son buenos o malos. Supongo que depende de pa quién, como casi toles coses na vida. En cualquier casu, son democráticos. Quiero dicir que son consecuencia de les regles del xuegu que nos tenemos dao; les qu’aceptamos: les mesmes regles de xuegu que posibilitaron que los anteriores lehendakaris nacionalistes gobernaren tantos años y condicionaren, dende les sos minoríes del congresu, la política estatal.
La paradoxa de los nacionalistes asturianos ye doble. Uno porque nunca condicionamos denguna política asturiana o española (más p’alló de casos mui puntuales) colos nuestros votos. Y dos, porque, por contra, siempre nos vimos condicionaos poles polítiques y estratexes d’estos otros nacionalismos periféricos. Siempre nos miraron, nos xulgaron y nos trataron en relación a ellos. Como si fuéremos un apendiz o una sucursal d’otros. Los avances y les amenaces de les sos polítiques condicionen la nuestra. Y tenemos sentío demasiaes veces coses como que’l bable nun ye oficial “nun vaiga ser que termine pasando como n’otros sitios”.
Otra manera, ellos nun ayudaron gota. Con apreciables excepciones, nunca nos reconocieron como miembros del so club. La tesis del PNV, BNG y CiU ye que n’España nun hai más que cuatro naciones: les d’ellos y España. Igual que, sigún ellos, nun hai más que cuatro llingües n’España: les d’ellos y el castellanu. Evidentemente, recalco, hai honroses excepciones n’esti planteamientu. Pero la tesis oficial de los tres partíos mencionaos ye esa. Y el restu, los que nun encaxamos n’esi esquema cuadráu quiero dicir, a cuatro bandes; somos excepciones pintoresques.
Nuevos tiempos, nueves polítiques. Seguramente, dende la oposición, estos partíos van entender meyor la nuestra situación. Pasa igual colos nuestros propios presidentes: desque dexen el cargu vuélvense más asturianistes. Y nós, énte ún y otro, paciencia, constancia y, sobremanera, sentíu común.
0 comments:
Publicar un comentario en la entrada