Menos cases y más coches

Ente les midides anunciaes pol presidente Zapatero, nel pasáu alderique del estáu de la nación, rescamplaron les de quitar les ayudes a la compra de vivienda y incorporar les de la compra del coche. La Constitución española establez como derechu fundamental el del accesu a una vivienda digna y, de momentu, nun diz nada del accesu a un coche dignu. Con too y con ello a mi nun me parez mal de mano la cuestión fiscal. Lo que nun tengo gota claro ye’l momentu.


Les ayudes fiscales teníen que s’haber quitao cuando crecía de manera descomanada la inversión inmobiliaria. Y non agora que sobra ufierta y falta demanda. Estos cinco años d’atrás yera evidente que l’españíu de la venta de pisos nun respondía a una demanda xeneralizada d’accesu a una vivienda digna. Si la mitá de les viviendes construyíes n’Europa taben n’España, taba claro qu’eso tinía más que ver con una actividá económica o industrial que con un derechu básicu a disponer d’un techu. Por eso nun cuadraba siguir incentivándolo fiscalmente. Por que, a ver si lo desplico: una cosa ye l’aspiración lexítima a nun dir descalzos pela cai y otra mui distinto apostar pola industria del calzáu. Son dos coses distintes y precisen dos tratamientos distintos.

Agora, a lo que parez, les coses cambiaron. Agora producir pisos ta mui mal pero producir coches ta mui bien. Y, cuidáu, a min tampoco me parez mal la decisión d’incentivar la venta de coches. Lo que nun me gusta ye la incoherencia de too ello. Vamos falar claro: lo que ta faciendo’l gobiernu ye baxar impuestos. Anque nun lo quiera llamar asina. Porque lo que nos da pa la compra d’un coche ye, más o menos, lo que vinía recaldando colos impuestos que cobraba cola compra de coches. Por eso, por cierto, cada vez entiendo menos lo del céntimu de más nel preciu la gasolina que sigue cobrando’l gobiernu autonómicu.

Cuento que les politiques; y más les fiscales; han ser coherentes. Y que nun val con tocar munches tecles; detrás tien qu’haber una melodía, un son. L’impuestu de sociedaes, que ye’l que paguen les empreses en función de los sos beneficios o perdes, va baxar. Y, na mio opinión, eso ye bueno. Porque si hai qu’apoyar a dalgún sector ye al de los creadores d’empléu; ello ye, a les empreses. Pero, claro, eso casa mal cola demagoxa de qu’esta crisis han pagala los ricos y que nun se va reducir denguna política social. Más nos valía dexanos de cuentos y atayar de frente les grandes cuestiones a les que siguimos arrodiando: la reforma fiscal y la reforma llaboral.