Esto de los impuestos ye complicáu; contradictoriu por demás. Por dicir: primero devuélvennos cuatrocientos euros de la renta y quitennos l’impuestu del patrimoniu. Y agora, el mesmu gobiernu, sube’l tabacu y la gasolina. ¿En qué quedamos? Eso sí, los responsables miraron bien en facer les baxaes primero d’unes elecciones y les subides depués d’otres y, sobremanera, contando que tovía quedara bien de tiempu pa les vinientes.
A naide-y gusta pagar impuestos. Pero tol mundu quier los servicios. Por eso nun quiero facer demagoxa con esti tema y entiendo que les alministraciones escueyan el momentu con perspectiva electoral. En cualquier casu, hai que pagar tributos. Y hai que s’atrever a falar d’ello colos ciudadanos con claridá. El tema ye importante. Discursos grandilocuentes aparte, de cómo diseñemos los impuestos va depender, y muncho, cómo vaiga evolucionar la economía y la sociedá futures. Les revoluciones de verdá fainse nel boletín oficial.
Ún de los oxetivos de cualquier sistema impositivu ha ser equilibrar les rentes. Ello ye, facer que la diferencia ente ricos y probes nun se dispare. Pero, por contra, otru de los oxetivos d’esi mesmu sistema ha ser dinamizar, animar, estimular l’actividá económica. Por una razón mui clara: pa repartir más hai que tener más. Y eso consíguese fomentando la creación d’empreses, de trabayu y de prosperidá y non castigando a los que s’arriesguen a ello.
Estos dos oxetivos nun son contradictorios y hai qu’atopar un equilibriu ente ellos. Si s’estimula por demás la xeneración de riqueza pue acabar fomentándose la desigualdá d’oportunidaes. Pero si se penaliza n’escesu l’actividá económica, pue acabar consiguiéndose una falsa igualdá na miseria. Col consumu o l’aforru pasa igual. Un excesu de cualquiera de los pue arruinar la economía. Bien.
Los impuestos básicos del nuestru sistema son cuatro: renta, sociedaes, iva y especiales. Caltener un equilibriu adecuáu énte los cuatro precisa axustes constantes; tomar decisiones, gobernar. Agora, por exemplu, lo que prima ye crear empléu. Parez razonable entós reducir les cotizaciones a la seguridá social; ello ye, abaratar l’empléu, incentivar les contrataciones. Otra manera, tamién interesa animar a les empreses a reinvertir los beneficios, a innovar, a nun des-localizase. ¿Por qué, entós, nun eliminamos l’impuestu d’actividaes económiques y baxamos l’impuestu de sociedaes o diferímoslu, polo menos, hasta que los dividendos nun se retiren.
Evidentemente, tendríemos que re-equilibrar la cuestión ¿Cómo lo podríemos facer, cómo cuadramos les cuentes? Pues subiendo l’Iva y l’IRPF. En definitiva, acercándonos más a Europa, fomentando más la creación d’empléu, l’actividá económica y l’aforru familiar y emponderando menos el consumu y la renta.
Como sé que da pa muncho, prometo siguir con esti tema.
0 comments:
Publicar un comentario en la entrada