Efectivamente, la derecha, pueden ganar les elecciones vinientes. N’Europa ya les ganaron, y con rotundidá. Mesmo nos países onde nun gobiernen, como’l Reinu Uníu, Portugal y Hungría; como nos que ya lo faen: talo qu’Alemania, Francia, Italia o Polonia. Polo visto, los ciudadanos europeos cuenten que, pa manexar esta crisis, van ser más eficaces los xestores lliberales que los socialdemócrates.
Ente otres coses; y esto ye una opinión personal; porque estos últimos anecien en que la culpa de too ye de los primeros y qu’ellos namás son víctimes. Y la xente, pamidea, nun pide acusaciones nin busca víctimes; quier soluciones.
N’España, como europeos que somos, les coses nun son tan distintes. La victoria de la oposición foi clara. Lo que nun veo tan claro ye qu’esi resultáu produza cambios nel executivu, na forma de gobernar. Cuento qu’el problema nun ye tanto l’ausencia d’apoyos o d’idees como la falta de voluntá pa llevales a la práctica. El gobiernu español sabe, o pue saber fácilmente, qué ye lo que tien que facer. Toi pensando na reforma llaboral, na conxelación del sueldu de los funcionarios o na intervención de bancos y caxes. Otra cosa distinto ye que tea dispuesto a facelo; que s’atreva. Y ehí ye onde yo nun veo cambios. Por eso digo que les coses van siguir igual: tomando decisiones por inercia, aplicando la plantilla ideolóxica, mirando más p’atrás que p’alantre y atendiendo más a los corsés teóricos que al interés xeneral.
Pero, dientru los partíos, la cosa va enseñase bien distinto. Nel PSOE ya empiecen aparecer les tensiones internes. Ye normal: hai preocupación, hai esmolecimientu, hai miéu. Van pidise desplicaciones y análisis internos. Y va haber que dar la cara; ye’l preciu mínimu que toca pagar cuando hai derrotes. Por contra, nel PP van vivir unos meses de tranquilidá interna, de confirmación del lideralgu, de xuntura. Les voces critiques van callar y los remos van intentar dir, toos ellos, na mesma dirección.
¿Y n’Asturies? Home, a lo que se ve, parez que los asturianos nun somos mui españoles nin mui europeos: sigue ganando la socialdemocracia. Ye verdá que por dos mil quinientos votos namás; pero sigue ganando. ¿Y por qué? Pues porque nunca basta con dexase llevar. Pa tar n’España y n’Europa nun val con dexalo al mapa. Pa tar colos tiempos, nun val con esperar a que les coses amiyen ensin facer por ello. N’esta campaña, el PP asturianu dexose llevar. Igual que’l PSOE, por cierto. Y pasó lo que pasó. Pero nes elecciones vinientes eso nun va valir: van tar más reñíes de lo que parez. Y queda bien poco.
0 comments:
Publicar un comentario en la entrada