Más sinceridá y menos problemes

Ya lo dicía mio güela: “la culpa quedó soltera porque nun tuvo quien la quixera”. Y poques veces tengo visto más aplicación a esta frase que n’esta campaña pa les elecciones europees. Como la crisis ye internacional, nun ye cosa nuestra. Tal parez que nun tamos n’esti mundu. Y como afecta a les grandes compañíes, poco tenemos que dicir los ciudadanos d’a pie. Hai que ver; como si los miles y millones de paraos nun tuvieren nada que ver con nós. O como si los miles y millones d’hipoteques que tenemos solicitao y aceptao nun fueren cosa nuestra.

La economía; igual que la política o la cultura; ye la suma de miles y millones de pequeñes decisiones individuales y caprichoses. Nosotros nun queremos que s’esanicie l’amazones, que se siga emitiendo CO2 a l’atmósfera, o que los neños de Calcuta tengan que trabayar por cuatro rupies en condiciones llamentables. Pero bien que nos presta comprar playeros o ropa barato (siempre más de lo que necesitamos), tener un móvil o un iPod (eso sí, de tamañu mediu), o comer un bon chuletón de vaca (que, sabe dios onde pació).

Nun tenemos que vivir achaplaos pola culpa. Respirar ye quitar osíxenu al aire y reemplazalu por anhídridu carbónicu. Necesitámolso pa vivir. Y, precisamente por ello, la solución nun va tar en dexar de respirar. Non. Pero tampoco val echar balones afuera y creer, por sistema, que’l mundu ta domináu por unos señores malos malísimos colos que nun tenemos nada que ver y que nun tienen otru porgüeyu qu’explotanos y facenos la puñeta namás que pa enriquecese y conspirar.

Tengo sentío en distintos mítines y eslóganes d’esta campaña que la culpa d’esta crisis nun ye de la xente normal (ya saben: de les marujes, de los pensionistes, de los trabayadores...). Sinon que ye de la codicia y de les multinacionales. Con esta manera de plantear les coses ye mui difícil albidrar soluciones. Ye una manera de desentendese hermana a la de los que piensen que les autoridaes y los señores gobernantes son infinitamente sabios y infinitamente buenos y nun tenemos que facer nada porque ya vendrán ellos a dicinos lo qu’hai que facer.

D’esta crisis vamos salir trabayando, aforrando y quitándonos de coses: de beneficios empresariales, de puestos de trabayu, d’impuestos, de subvenciones... Y que naide cuente que nun vamos tener que renunciar a nada. Vamos dexar pelos na gatera; munchos pelos na gatera. Y los que sigan empeñaos n’echar la culpa a los otros; por exemplu, los responsables d’esta campaña electoral tan manifiestamente ameyorable; nun tan ayudando gota. Necesitamos más sinceridá y menos problemes.