Nun me parez mal que los ricos paguen más impuestos. Parezme incluso bien. Ye lo normal; pa re-equilibrar les rentes fai falta que contribuyan más los que más ganen. Y, asina, l’alministración encárgase de gastar lo recaldao beneficiando a los que menos tienen. Nun ye namás por caridá, por humanidá o por xusticia (que tamién); sinon por un sentíu prácticu de la convivencia: una sociedá con menos diferencies sociales ye una sociedá onde se vive meyor.
L’oxetivu ye eliminar les diferencies de partida, non les de llegada. La idea ye proporcionar oportunidaes a los que menos tienen o a los que, por enfermedá, por exclusión o por mala suerte, nun son a competir. En definitiva, preténdese una igualdá perriba: nun ye cosa d’acabar colos ricos; ye cuestión d’acabar colos probes.
Too eso ta mui bien, pero entós, ¿Qué pasa cuando los que más ganen quieren gastalo precisamente beneficiando a los que menos tienen? ¿Pa qué va facer l’alministración un doble papel; el de recaldador y el d’inversor; que lo único que va consiguir ye volver a dexar les coses nel mesmu sitiu? Y, en cualquier casu, ¿Quién va facer meyor esi llabor?
Vamos pensar, por dicir, na creación de puestos de trabayu. Angüañu ye una prioridá xeneral. Y tol mundu ye apautase en que les que meyor faen esi llabor son les empreses. Nestos tiempos de crisis, tamos dispuestos, inclusu, a ayudales con bien de fondos y subvenciones con tal que nun pesllen. Y si son a crear empléu, l’apoyu, polo menos de palabra, ye entusiasta. ¿Por qué, entós, siguimos achaplándo a eses empreses con un treinta por cientu nel impuestu de sociedaes? Igual munchos nun lo saben, pero ye de los más altos d’Europa. Y hasta hai poco yera peor: yera’l treinta y cinco.
Si una empresa tien beneficios, estupendo. Trátase d’eso, de ser competitivos, de tener futuru. Si esa empresa, decide reinvertir los beneficios, meyor que meyor: va ser más fuerte tovía y va xenerar más empléu. Si, por contra, decide repartir esos beneficios como dividendos, entós val: podemos gravar a los rentistes. Pero eso nun se consigue col impuestu de sociedaes; sinón col impuestu de la renta; l’IRPF. Un impuestu progresivu; ello ye, nel que paga más el que más renta recibe. ¿Qué queremos, facelu más progresivu tovía? Ello ye, que paguen tovía más lo más ricos. Pues, por mi, dengún problema. Pero, lo que nun tien sentíu ye que; talo como pasa agora; sigan pagando igual les empreses que deciden reinvertir a les que deciden repartir.
Eso ye, simplemente, suicida.
0 comments:
Publicar un comentario en la entrada