El presidente Areces acaba cumplir diez años nel cargu. Hai que ver cómo pasa’l tiempu. Echando la vista atrás, el nuestru presidente diz que ya tien toles sos ambiciones polítiques resueltes. Nun tenemos por qué nun lu creer. Tres lexislatures enteres como alcalde de la so ciudá y camín de completar la tercera como xefe del executivu asturianu enseñen un balance bayurosu. Quitando otres consideraciones, lleva ganaes seis elecciones siguíes. Y eso, hai poca xente que lo pueda dicir.
Como presidente, les tres veces que se tuvo presentando al cargu, compitió col mesmu candidatu na oposición: Ovidio Sánchez. Y siempre lu ganó. Igual por eso el señor Sánchez ya anunció que nun se diba presentar una cuarta vez y dexó abierta la carrera pola busca del nuevu candidatu nel partíu popular asturianu. Con too y con ello, inda nun sabemos lo que va facer el señor Areces, nin quien va ser el viniente cabeza de cartel socialista. (Bueno, seguramente empiece por Javier y acabe por Fernández; pero esto son coses mies; ya saben: falar por falar).
A lo que diba, como ye bien conocío, na nuestra lexislación nun hai tope de mandatos. Pero la tendencia vien siendo que’l que gana, o cuenta ganar, repite. Jordi Pujol presentose seis veces y ganó les seis; hasta que se retiró. Manuel Chaves tamién ganó les seis veces que se presentó n’Andalucía pero nun se retiró: marchó de ministru pa Madrid. Felipe Gónzalez presentose seis veces y nun siempre ganó. Perdió les dos primeres y la última, aquella derrota dolce del 96, ¿alcuérdense? Manuel Fraga intentolo en Madrid y perdió siempre. Hasta que marchó pa Galicia, onde algamó cuatro victories absolutes y una derrota final.
Lo dicho: nun hai tope de mandatos nin fórmules máxiques p’asegurar la victoria. Nin por excesu nin por defectu. L’alcalde d’Uviéu, el señor Gabino de Lorenzo, animose a ser candidatu a les xenerales depués d’algamar cuatru victories siguíes nes elecciones locales. Nun podía perder. Pero perdió. Igual que’l presidente Aznar que, reduciendo los sos mandatos a dos, contaba retirase nos niveles más altos de popularidá y ensin el desgaste propiu del poder. Y paso-y exactamente tolo contrario.
Ye mui probable que’l presidente Areces nun repita como candidatu. Pero, igual que-y pasa al so oponente, el señor Sánchez, ye demasiao nuevu pa retirase; inclusu nel país de les pre-xubilaciones; y demasiao dependiente del aparatu. Por eso-yos cuesta tanto, a los ex-presidentes y a los ex-candidatos topar una salida digna pa la so carrera. Y necesítenla. Ellos y nosotros. Pol bien de la renovación y por respetu institucional.
0 comments:
Publicar un comentario en la entrada