Anda revuelto la cosa de la sustitución política nel nuestru país. Na oposición, Alvarez-Cascos avisa que pue volver. Yo, la verdá, nun cuento que vaiga pasar. Desembarcar como’l primeru nun ye tan fácil, nin siquiera pa él. Pero’l miéu y les espectatives que ta xenerando esti anunciu diz muncho de cómo funciona angüañu la derecha asturiana.
Cascos tien personalidá; eso naide lo pue negar. Empezó na transición de conceyal y acabó recorriendo casi tolos escalones de la política española. Foi vicepresidente, ministru y secretariu xeneral y, coles sos ambiciones personales bien fartuques; sigún declaró él mesmu; hai años anunció la retirada. Pero como la palabra “nunca” significa otra cosa en política, hai tiempu que Don Francisco ta desdiciéndose. Cuando con discursos, cuando con declaraciones, va dexando caer que, pa terminar les coses qu’empezó, seique-y pagaba la pena volver arremangase. Y como nes obres públiques (y na derecha asturiana) hai tantes coses pendientes... pues esa espada de Damocles nun hai manera de posala en suelu.
Efectivamente, la nuestra derecha tien asignatures pendientes. Si me permiten la simplificación, yo diría que tres. La primera, que nun termina d’enseñase como opción ganadora. Ye verdá que con Sergio Marqués ganó una lexislatura. Pero aquello acabó como acabó y, más que como alternativa de gobiernu, los ciudadanos siguen viéndo a los conservadores asturianos como candidatos a la oposición. La segunda, que nun terminen d’arreblagar les tensiones internes: les localistes, les institucionales y les de la renovación permanente. Por dicir, nel últimu congresu, la candidatura non oficial anduvo pel cuarenta por cientu los votos. Y eso ensin tener detrás denguna agrupación aparente nin apoyos exteriores remarcables. Hai, amás, demasiaos expedientes abiertos y una cierta sensación de que tovía nun s’atopó´l camín nin el discursu mas amañosu. Y la tercera, que sigue pesando la idea de que los políticos tan na carrera mirando más el so porgüeyu personal que’l bien común. Ye verdá qu’esto ye un mal xeneral de la dedicación pública, pero cuando se dan les dos circustances mencionaes primeru; oposición permanente y divisiones internes; esto último del interés priváu gana pesu.
Por eso digo que la vuelta de Cascos más que un problema, o una solución, ye un síntoma d’otres causes más fondes. Mala solución ye que’l futuru de la derecha asturiana dependa de mirar al pasáu. Con tolos respetos, Cascos ye un activu que nun se pue marafundiar. Val. Pero si la única manera que tien Don Francisco d’integrase na tripulación asturiana ye siendo’l capitán del barcu, dalguna cosa ta fallando nos mecanismos de selección de personal. Ovidio Sánchez tien un retu: facer qu’esos mecanismo funcionen. Y buscar el meyor.
0 comments:
Publicar un comentario en la entrada