El mapa’l tiempu

El tiempu pasa y va dexando buelgues de lo que nunca fuimos. En fín; igual la madurez ye eso: estremar lo que nun depende de nós y concentrase no que podemos ameyorar porque, eso sí, ye cosa nuestra. Lo contrario, renegar de lo que nun conocimos pa evitar lo que tovía podemos facer ye una manera cómoda de nun tener qu’enfrentanos a nosotros mesmos. Ayer camudaron el mapa del tiempu na televisión vasca. Yera ún de los puntos del acuerdu d’investidura del nuevu gobiernu. Y nun crean que lo digo en broma. Non. La política ye l’arte de los símbolos y esti nun ye de los peores.

Hasta agora la televisión vasca, gobernada pol PNV, enseñaba los siete territorios históricos de fala vascuence nun espaciu únicu, ensin fronteres interiores. Pero, eso sí, bien estremao del restu’l mundu qu’aparecía en blancu. Dende ayer, con un lehendakari socialista, les coses cambiaron. Agora hai unes llínies sutiles qu’enseñen la estremadura ente Navarra, Guipuzcoa, Vizcaya, Lapurdi, Zuberoa, Benafarroa y Alava. Ello ye, el mapa’l tiempu vascu sigue ensin ceñise al espaciu propiu de la comunidá autónoma; sigue incluyendo territorios afuera de la so competencia (tampoco habia que pasase). Pero, eso sí, agora train la rayina precisa pa que nun se diga qu’hai imperialismu. Y hai más: pa que naide proteste por incluir el tiempu nestes zones sospechoses de construcción de la “gran patria meteorolóxica euskalduna”, d’equí pa en delantre, tamién van aparecer soles, o nubes, enriba la Rioxa o Cantabria. Y ye que parez ser qu’hai munchos televidentes vascos que van ehí de vacaciones. Lo que, la verdá, como argumentu, nun sé si ye pa meyor o pa peor.

Sigue llamándome l’atención el pocu interés políticu y real por vincular territorios dientru d’España; la paranoia pol munchu peligru que parez añerar amatagáu dientru la xuntura d’Euskadi con Navarra; o de Cataluña con Valencia; o ¿d’Asturies con Lleón? Y, en fín, y por contra, la obsesión, cara al exterior, pola xuntura d’esos mesmos territorios. Puertes afuera, nun podemos dir separaos. Puertes adientro, que naide se xunte con naide.

Seique porque una imaxe val más que milenta palabres, pero hai que ver lo fácil y tonto que ye poner un mapa’l tiempu pa que tol mundu se ponga nerviosu. Ye fácil porque nun compromete a nada nin obliga a recalcular votos o presupuestar servicios. Y ye tonto porque la xente tómalo en serio. Igual por eso yera cosa de poner na TPA un mapa’l tiempu con Asturies, Lleón y Zamora, l’Asturies de Santillana y Miranda’l Douru. Más que nada por tocar los pies agora que tamos colo de la financiación. Ya m’entienden.