Difícil equilibriu'l de los ciudadanos que vemos cómo los gobernantes usen los nuestros recursos. Les perres, vamos. Doscientos quince millones pa financiar l'ampliación del Musel, otru tanto pal Hospital Central, nunsecuantos pal Palaciu de Xusticia n'Uviéu, mira ver pa la Llaboral... y lo que nunca vamos saber: cómo pudo quedar la financiación autonómica y municipal si se llega negociar con más xeitu.
Énte esto, ¿qué podemos facer los ciudadanos? Fáltennos datos. Como contribuyentes d'a pie nun podemos conocer cómo y por qué se tomen eses decisiones. ¿Podemos entós denunciales con fundamentu? ¿Tenemos que nos callar pa llavar la ropa puerco en casa y que nun nos quiten la financiación exterior? ¿Respetar a los gobernantes ye otorgar?
La repuesta nun ye fácil pero una cosa ye cierto: contra más información tengamos meyor nos va dir. Un pueblu analfabetu ye un pueblu fácil d'engañar. Ya lo dicía Che Guevara, pero, más primero, ya lo tinía apuntao Xovellanos: la ilustración ye la llave del progresu y de la felicidá.
0 comments:
Publicar un comentario en la entrada