La política ye l’arte de lo posible, de les grandes palabres y de los pequeños símbolos. Sí. Pero tamién ye, más que nada, l’oficiu de saber alministrar los bienes comunes. Honradez y eficacia; esa ye la clave. Menos carisma y más resultaos: asina tendríemos que medir a los nuestros alministradores. Pero cuesta.
Doscientos quince millones de creditu namás pal sobrecostu de l’ampliación del Musel; alredor de seiscientos si contamos, entós, tolo que llevamos presupuestao; doscientos sesenta millones en total, y con permisu del sobrecostu, pal nuevu Hospital Central d’Asturies; ciento noventa millones pa la construcción del futuru Palaciu de Xusticia n’Uviéu; cincuenta y ocho millones poles oficines autonómiques del Calatrava; ochenta y tres millones a gastar pal proyectu de la Llaboral...
Con tantos millones y tanto baille de cifres astronómiques nun sabemos si ye muncho o poco, xusto o necesario. Pero podemos comparar. Y, nesi sentíu, la sensación xeneral de que los presupuestos tan pa incumplilos, o pa “compensar” otres operaciones cruzaes, ye demasiao bultable. Nun ye que les coses valgan muncho. Ye que valen casi’l doble de lo que teníen que valir. El volume de los sobrecostos nes obres públiques asturianes nun ye razonable. Por nun falar de los retrasos. Claro que ye complicao calcular al céntimu el preciu final d’una obra, o el tiempu que va llevar. Pása-y a tol mundu en casa cuando llama a un fontaneru y detrás vien l’albañil. Pero, señores alministradores de lo nuestro: nun tracamundien dificultá técnica con despilfarru. Nun confundan complexidá o imprevistos con incapacidá pa xestionar o pa delegar. Somos ciudadanos, nun somos tontos.
El problema de les grandes cuentes públiques ye que la xente d’a pie nun tenemos suficiente información nin criteriu. Fáltennos referentes pa ser quien a emitir xuicios definitivos. Y tenemos que nos enfotar. Pero nun nos enfotamos y el círculu viciosu del desapegu políticu sigue medrando: contra menos creemos a los políticos, menos miramos pa ellos; y contra menos miramos pa ellos, más llibertá-yos damos pa siguir alministrando lo nuestro ensin el control necesariu.
Precisamos más información. Pero nun tenemos que nos confundir: la culpa ye nuestra porque la información ta ehí. Ta mediatizada (vamos, que se da a medies) y la mayor parte ye más propaganda qu’otra cosa. Eso ye verdá. Pero si somos quien a lleer ente llínies, tolo que necesitamos saber ta nos papeles o nes pantalles d’ordenador. Si tuviéremos un negociu, nun díbemos poner a cualquiera d’alministrador. Pues esti país ye’l nuestru negociu común; ye la nuestra casa colectiva; y necesitamos que nos lu alministren bien. Y que nos enseñen cómo.
0 comments:
Publicar un comentario en la entrada