La verdá que cada añu me presta más dirixime a vosotros, a unos estudiantes de veranu, porque pueo falar con xente que sabe lo que ye l’esfuerzu. Envede quedar na playa o en monte de vacaciones, toos vosotros decidísteis venir equí, a Siero, a EVADES, a echar unes hores y unos díes esforzándovos por aprender un poco más, por algamar más conocimientos. Y eso; esa voluntá de meyorar, de progresar con esfuerzu; diz muncho de vosotros.
Dicen que tamos nuna sociedá competitiva. Una sociedá onde lo importante ye destacar perriba los demás. Onde lo que cuenta ye algamar l’éxitu y la fama al preciu que seya. Yo nun lo creo. Yo mírovos a vosotros y cuento que lo que vos fizo venir equí nun foi ser más competitivos que los demás, sinon ser más competentes. Mírovos y cuento que nunca visteis a los otros, a los vuestros compañeros, como l’enemigu o’l problema. Non. Por contra, mírovos y veo que’l retu, el verdaderu retu que vos fizo venir equí foi’l superavos a vosotros mesmos.
Y teneis razón. L’éxitu, l’éxitu verdaderu, nun tenemos que lu medir atendiendo pa los demás. Ya lo diz el refrán: mal de munchos, consuelu de tontos. Y nun me parez qu’equí haiga munchos tontos. La midida verdadera de la satisfacción ponémosla nosotros. Lo realmente decisivo ye cumplir coles propies aspiraciones de ca ún. Coles grandes y coles pequeñes. Coles más ambicioses y coles más modestes. Coles más aparentes y coles más discretes. Pero siempre coles vuestres. Y vosotros, ca ún de vosotros, viniendo a esta escuela de veranu de Siero, esmoleciéndovos por aprender, acabais de cumplir con una d’elles. Y non de les pequeñes.
Nun vos facer de menos. Nenguna sociedá progresa si nun ye cola suma del esfuerzu personal de los sos ciudadanos y del esfuerzu colectivu de les sos instituciones. EVADES, la Escuela de Veranu de Siero, ye quien a xuntar estes dos coses. D’una mano, dispón del apoyu institucional d’empreses, entidaes y ayuntamientu que, tamos seguros, va siguir aumentado cada añu. Y d’otra, cuenta con alumnos como vosotros que, añu tres añu, tais dispuestos a algamar más conocimientos. Pero EVADES dispón de dalgo más. EVADES cuenta con un equipu humanu extraordinariu que sigue trabayando con rigor y eficacia pa facer realidá un sueñu proyectáu hai ya doce años. Y eso, les persones, ye lo decisivo. Ellos y vosotros sois los verdaderamente importantes.
Son tiempos complicaos. Hai crisis y naide sabe cómo va ser el futuru. Pero nun hai que s’asustar. Nun ye la primer vez que vivimos años enguedeyaos. A los nuestros güelos y güeles, a los nuestros padres, a los antiguos que pelearon por dexanos un mundu meyor, naide-yos regaló nunca nada. Ellos, como vosotros, tamién teníen un sueñu, una ambición. Ellos tamién queríen meyorar la so posición personal, trabayar meyor, ganase la vida y sacar la so familia alantre. Y, nunos años bastante más complicaos que los d’angüañu, supieron pelear por ello.
Mio madre yera fía d’un mineru. Un paisanu seriu, duru y trabayador. Un paisanu de los d’antes que si tinía dalguna cosa clara yera que l’esfuerzu y el conocimientu abríen puertes. Igual por eso nun facía munchu casu a mio madre cuando ella protestaba por tener que dir caminando tolos díes más de cinco kilómetros hasta l’institutu. Y volver. Lloviera o nevara. Daba igual. Había que dir: los estudios yeren lo primero. Y n’acabando l’institutu, a la universidá. Asina, con esfuerzu y constancia, foi como mio madre; una muyer, fía de trabayadores, na década de los cincuenta; consiguió acabar una carrera.
Si-y preguntáremos agora poles asignatures qu’estudió o polos artículos del códigu civil que tuvo qu’aprender de memoria, diríanos que nun s’alcuerda de nada. Y ye verdá. Pero pueo aseguravos que lo que sí-y quedó a ella; y a tolos que, como vosotros, fuisteis quien a esforzavos por algamar más conocimientos; ye precisamente eso: la cultura del esfuerzu. Esi ye’l meyor diploma que vos pueden dar. Esa ye la meyor recompensa que podéis consiguir. Esi ye’l meyor regalu que vos pueden facer: aprender a esforzavos.
Y por eso quiero felicitavos. Por nun quedar cruzaos de brazos y venir a esta Escuela de veranu de Siero. Por ser como sois. Y por tener fecho lo que ficistéis. Por too ello: n’horabuena, y munches gracies.
0 comments:
Publicar un comentario en la entrada