Mileuristes

Parez ser que la mitá de los trabayadores asturianos cobren menos de mil cien euros mensuales. Un cincuenta y cinco por cientu, pa ser más precisos. Demasiada xente cobrando demasiao poco. Cinco de cada diez asturianos con un salariu que nun da pa nada. ¿Y de quién ye la culpa? De mano, hai que lo confesar, la tentación primera ye mirar pa los pagadores inmediatos; pa los patronos. Sí, efectivamente, esi va ser el problema: la culpa ye de los empresarios que nun quieren ver que con mil euros de nada cuesta muncho llegar a fin de mes. Claro, como ellos cobren salarios millonarios...

Pues non. La culpa nun ye de los empresarios. O, polo menos, el problema nun ye que los empresarios nun quieran enterase que cobrar mil euros ye poco. ¿Y saben por qué lo digo con tanta seguridá? Pues porque siete de cada diez empresarios y profesionales autónomos asturianos cobren menos de mil cien euros mensuales. Un setenta y cinco por cientu, pa ser más precisos. Sí, sí, como-yos suena: hai más proporción d’empresarios mileuristes que de trabayadores mileuristes.

Ye lo que pasa coles estadístiques: que, hai veces, qu’enseñen datos que contradicen los nuestros prexuicios. Por eso quedamos plasmaos y nun terminamos d’entendelo. Agora resulta que los empresarios; ello ye, los ricos; cobren menos que los trabayadores; ello ye, los probes. ¿Ye verdá eso? ¿Tenemos que lo creer? Bueno, pues sí: tenemos que lo creer. Y, la verdá, a mi, personalmente, nun m’estraña tanto. Conozo munchos empresarios y la mayoría d’ellos son xente sacrificao; profesionales conscientes que saben que lo importante ye la viabilidá del negociu y que cuenten que ye una fatada ponese un salariu desproporcionáu si la rentabilidá de la empresa nun ta al altor. Por descontao, tamién hai impresentables, estafadores y pufistes. Pero, como digo, la gran mayoría d’empresarios taríen encantaos de pagar, y cobrar, salarios más altos si el negociu lo diera.

Pero, entós, si nun ye namás cuestión de voluntá ¿Cómo podíemos facer pa que la xente; empresarios y trabayadores; ganaren más? ¿Cómo podríemos arreblagar el mileurismu? Bueno pues, na mio opinión, la cosa nun pinta fácil. Énte otres coses, porque la salida al mileurismu pasa per otra palabra tamién cargada de prexuicios y mala prensa: la productividá.

Y ye que, por munches vueltes que-y deamos, la única manera real qu’existe p’aumentar los salarios ye facer qu’aumenten los beneficios de les empreses. La única manera sostenible qu’existe pa que los trabayadores ganen más ye conseguir que les empreses ganen más tovía. ¿O por qué cuenten si non, que pa Suecia hai menos mileuristes que pa Burundi?