Tolos partíos sufren el problema del tresfuguismu. Si los datos nun me fallen, n’España hai diez ayuntamientos que pasaron d’esta manera a manes de los socialistes y dieciséis a les de los populares. Nun tengo los datos de los partíos más pequeños, pero, n’Asturies tenemos el casu evidente del conceyal de Piloña, José Angel García, “Allende”, al que la comisión antitresfuguismu declaró tresfuga por dexar al so partíu, Izquierda Asturiana, pa pasar a ser Teniente Alcalde col PSOE. Y ellí sigue.
La llei nun pue facer munchu nestos casos porque, en derechu, les actes de cargos públicos pertenecen a les persones. Non a los partíos o a les llistes peles que se presenten. Non. Y la razón hai que buscala n’eso que se conoz como principiu de soberanía nacional. Ello ye, los representantes nes instituciones parlamentaries españoles; en toes y caúna d’elles; nun representen a los sos votantes. Nin siquiera a la so circunscripción. En derechu, representen namás qu’al conxuntu de los ciudadanos; a la nación española. Y, sí, ya sé qu’esto suena raro nun sistema políticu como l’español nel que ta mui mal vistu declarase nacionalista. Mesmo de les naciones perifériques que de la propia nación española. Pero esa ye la realidá, nun hai que se confundir. En términos xenerales, el discursu mayoritariu anecia en que’l nacionalismu; en principiu cualquiera d’ellos; ye malo, pero la llei, empezando pela Constitución, lu consagra de manera inequívoca.
Otra manera, ye verdá que vivimos nuna partitocracia. Ello ye, nun sistema onde los que manden de verdá son los partíos. Afuera d’ellos; y sobremanera de los dos mayoritarios; hai poco que facer. Ún de les cuestiones más evidentes ye que resulta mui raro ver un diputáu votando encontra’l mandáu del so grupu parlamentariu. Disciplina de votu, lu llamen. Pero ye una convención interna, un pautu tácitu, la confirmación del famosu principiu del que’l que se mueva nun sal na semeya. Pero, en derechu, nun hai denguna disposición llegal qu’enconte esta práctica. Ye más, en casu de contradicción nun hai denguna dulda: los diputaos puen votar lo que quieran y cambiar de grupu cuando quieran.
Nun sé si esto ye necesariamente bueno o malo. Lo que tengo claro ye que, si de verdá ye tan pernicioso pa la democracia, esti ye un casu claru nel qu’habría que cambiar la llei. Y la constitución. Lo que pasa ye que, igual pola nuestra mentalidá tan poco práctica, préstanos demasiao consagrar grandes principios nes lleis y depués sorprendémonos cuando tenemos que los aplicar. Por eso hai que tener bien de cuidáu cuando s’apreben les lleis. Porque depués hai que les acatar. Y eso resquema.
0 comments:
Publicar un comentario en la entrada