Criticar ye fácil. Lo difícil ye aportar soluciones. Tolos gobiernos dicen que la oposición nun fai otra cosa que criticar y toles oposiciones dicen que los gobiernos nun son a solucionar los problemes reales de la xente. Y lo peor ye qu’entrambos los dos suelen tener razón. ¿Por qué? Bueno pues igual porque, con tolo malo que echamos d’ellos, a lo último siguimos esperando demasiao de los políticos.
Nel casu asturianu, cuesta ver una alternativa a l’actual alministración. Y esto nun ye una crítica, ye una constatación. A estos altores de la lexislatura nun hai un candidatu, o candidata, a la presidencia del Gobiernu y, polo tanto, munchu menos un gabinete na solombra, al estilu británicu, que lu enconte. Nun hai un cartel visible y, asina, les declaraciones del portavoz popular, nel plenu institucional pol día de la nación asturiana, diciendo que’l Gobiernu d’Areces taba “agotáu y ensin idees” nun aporten nada. Da igual que seya verdá o non. Lo importante, lo decisivo de verdá, ye convencer a los ciudadanos que la oposición sí tien eses idees y que, a lo último, son meyores que les del executivu.
Nel casu español, el panorama ye un poco distintu. Pero un poco namás. Eso sí, la oposición tien un candidatu claru y atrévome a dicir qu’un programa alternativu qu’enseñar. Otra cosa ye qu’aneciemos en nun querer velu o en distraenos col xuegu d’acusaciones cruzaes y otres frivolidaes. Por exemplu: esta mesma selmana, el líder de la oposición española, a preguntes de los internautes, declaró que les sos prioridaes en materia económica diben ser, y cito: “un plan d’austeridá y control del gastu públicu, una rebaxa d’impuestos a los emprendedores, la resolución del problema del créditu y cinco reformes estructurales; en concretu enerxía, llaboral, xusticia, educación y unidá de mercáu”. Bonu, yera un resume rápidu y interesante qu’enseñaba una alternativa a l’actual política. ¿Resaltose eso en dalgún titular? ¿Provocó nueves preguntes d’otros internautes pa qu’afondara n’ello? ¿Anubrió les crítiques de la falta d’idees? La repuesta ye non. Ente otres coses porque, n’esa mesma entrevista, preguntáron-y qué pensaba de la foto de ministros socialistes llevantando’l puñu nel mitin de Rudezmu, y el señor Rajoy contestó que-y daba igual, que-y parecía triste y antiguu, pero que mientres nun-y pegaren col puñu, daba-y igual. Y, claro, eso foi lo que rescampló nos titulares, nes polémiques y nos comentarios de los díes siguientes.
Pa que depués digamos que queremos que los nuestros políticos aporten idees de gobiernu en cuenta tar tol día engarrándose ente ellos. Ye mentira: préstanos más una engarradiella qu’una idea.
0 comments:
Publicar un comentario en la entrada