Impuestos

Los impuestos son una cosa mui seria. Una ferramienta peligrosa que pue provocar grandes males o grandes remedios. L’alministración Zapatero acaba anunciar la so intención de subilos “de manera temporal y namás que pa les rentes más altes”. Personalmente parezme la confirmación d’una estratexa enquivocada. Mui enquivocada. Y lo que ye peor: una estratexa enquivocada que va provocar unes consecuencies totalmente opuestes a les intenciones (quiero contar que buenes) de l’executivu que les ta promoviendo.

Los impuestos valen pa munches coses. Ente otres sirven pa re-equilibrar les rentes. Seique esta ye la so función más conocida y popular. Los que más ganen contribuyen más y asina l’alministración pue invertir ayudando a los que menos tienen. Esa ye, por exemplu, la función básica del IRPF que, por definición, ye un impuestu progresivu y escaláu. Ello ye, un impuestu nel que nun paga tol mundu lo mesmo; nin siquiera paga más pero na mesma proporción. Non. Por contra, nel IRPF, contra más alta seya la renta, más se multiplica la escala y más crez la desproporción. Y asina les rentes más baxes paguen cero y les rentes más altes paguen hasta’l cuarenta y cinco por ciento de tolo que ganen. Ye, polo tanto, un impuestu mui mui desigual y eso ta bien: esa ye la so función, tenémoslo asumío y furrula.

Ensin embargu, sigún el propiu Zapatero, nun ye l’IRPF l’impuestu que se va tocar. Cosa que parez contradictoria con tola retórica anterior y que, amás, nun podemos dar por segura, por dos razones. Una porque, hai tres meses, el propiu presidente ya anunciara que nun contaba subir dengún impuestu, y miren agora. Y dos, porque cola segura eliminación de la devolución de los famosos cuatrocientos euros, que tan frívolamente valió como reclamu electoral, y qu’agora parez dase por amortizada, ya se ta modificando “dafechu” la escala del IRPF.

¿Qué impuestos se van tocar entós? Pues, a lo que parez, la cosa apunta a les rentes de capital. Dicho asina suena mui d’izquierdes, mui progresista y mui igualitariu. ¿Por qué digo, entós, qu’esta suba impositiva va traer males consecuencies? Pues porque los impuestos tamién valen pa re-orientar, pa direccionar, pa empobinar l’actividá económica. Y ehí ye onde cuento que’l gobiernu español ta aneciando en dos decisiones enquivocaes. Una, fomentar el gastu envede la inversión, devolviendo primero cuatrocientos euros del IRPF pa que se gasten (cosa qu’agora va correxise) pa subir agora los impuestos a les rentes de capital, ello ye, castigando l’aforrru de les families y los inversores. Y dos, enfotándose n’ampliar el paru (con bien de chapuces y contradicciones), envede centrase en posibilitar la creación d’empléu.