Y venga enredar colos cuatrocientos euros

Hai que ver lo que tan dando de sí los famosos cuatrocientos euros. Empiezo pel final: Zapatero anuncia una suba d’impuestos y cífrala, elli mesmu, nel 1,5 % del PIB. Eso supón unos dieciséis mil millones d’euros. Si dividimos esta cantidá ente cuarenta millones de contribuyentes, ¿saben a cuanto tocamos? Pues eso: a cuatrocientos euros por cabeza.
¿Suéna-yos la cifra? Efectivamente, son los mesmos cuatrocientos años que, en plena campaña electoral, Zapatero prometió devolver a cada español. Un viaxe d’ida y vuelta ablucante: primero promete que nos los va devolver; depués descubrimos que lo único que fai ye nun retenenoslos; y agora, pa ciarrar el círculu, enseña la so intención de recaudalos vía impuestos.

Dalgunos puen argumentar que los primeros cuatrocientos euros “a devolver” yeren lliniales, iguales pa tol mundu; ello ye, d’izquierdes. Y que, por contra, estos otros cuatrocientos euros “a recaudar” son namás pa les rentes más altes, y van ser, polo tanto, desiguales; ello ye, de dereches. Pero, na mio opinión, prexuicios y tonteríes aparte, entrambes les dos afirmaciones son inexactes. De mano, porque cuento que prometer cuatrocientos euros pa cada contribuyente, ensin valorar la so renta real, nin la so situación económica particular, supunxo un error y una frivolidá graves. Nun ye namás que se tratara por igual al banqueru y al chofer del banqueru. Non. Ye que maltratose y dexose afuera d’esta midida a tolos paraos, los estudiantes, los amos de casa o los pensionistes que, ta claro, necesitaben más que naide esti “incentivu”. Y, en segundu llugar, por contra, porque con esta suba d’impuestos, tampoco ye verdá que vaigamos incidir namás que nes “rentes más altes”. Non. Eso, con ser discutible, igual pasaba si se contara tocar namás la escala superior del IRPF. Que, como’l so nome indica, ye l’impuestu de la Renta. Pero non: lo que va tocase van ser los fondos d’inversión y, a lo que parez, l’IVA. Ello ye, va penalizase la prudencia de tolos qu’aforren y el consumu de los que más lo precisen. Y nun digo qu’esto seya malo: digo que, como política, ye contradictorio.

Y pa terminar de rematala, tenemos l’ayuda de los cuatrocientos venti euros. Una cifra sospechosamente hermana a la del salariu social y a la de les pensiones non contributives. Pero que, al pervertilos aplicandolos namás qu’a aquellos a los que se-yos terminó’l paru esti añu; con un claru interés estadísticu; vuelve dexar afuera a los que más lo necesiten: a los paraos de llarga duración o a los que nunca entraron nes llistes.

Conclusión: siguimos enredando (y mal) colos mesmos cuatrocientos euros de quita y pon.