Hai que ver lo complicao que pue llegar a ser la política, la organización de la cosa pública. Queremos democracia, división de poderes y presunción d’inocencia, pero tamién mano dura y tolerancia cero cola corrupción. Sobremanera cola de los otros y, si ye posible, ensin tener qu’atender poles condenes xudiciales.
Queremos un sistema penal humanizáu, civilizáu y enfocáu a la reinserción, pero pidimos el cumplimientu íntegru de les condenes “pa qu’esos desgraciaos paguen lo que ficieron pudriéndose na cárcel”. Nun nos gusta que nos digan lo que tenemos que facer, comer, fumar o conducir; pero, namás col miéu al carné por puntos y a la pena de prisión pa los conductores bebíos, somos a reducir el númberu de muertos na carretera. Queremos al exércitu afuera del monte Gorbea d’Euskadi pero bien adientru de los atuneros vascos. Y, en definitiva, queremos llibertá y queremos seguridá, pero nun nos enseñamos mui dispuestos a pagar el preciu y los inconvenientes de la una y de la otra.
La democracia ye un sistema imperfectu. Ye complicáu, ye caru y ye abiertu; ye preocupantemente abiertu. Por eso, el que prefiera un futuru cargáu de certidumes y verdaes absolutes tien que guetalu n’otru lláu. Y, la verdá, yo nun lo recomiendo: les utopíes nun dexaron mui bon tastu n’esti sieglu pasáu. Regles de xuegu clares y futuru abiertu: esi ye’l fundamentu del nuestru enguedeyáu sistema européu de convivencia. Y ye verdá qu’hai vueltes que preferíemos más eficacia y menos amagüestos; más llimpieza y menos histories. Por exemplu: pidimos a don Mariano y al restu de responsables del PP que s’arremanguen y despidan a tolos que tienen que ver cola trama Gürtel, o como se diga Correa n’alemán. Nun pue ser tan difícil: Doña Esperanza fízolo en Madrid y buen lluéu; en venticuatru hores echó del partíu a los tres imputaos, y puntu. Pero, ai amigu, ehí empezó otra; porque pudo echalos del partíu. Sí. Pero l’acta de diputaos siguió siendo d’ellos. Y ye que ya ven: coses de la democracia y del principiu de soberanía nacional. Y aprovecho pa remembrar que siempre repetimos que nun queremos una democracia secuestrada poles cúpules de los partíos; una partitocracia, uf, lo peor; pero nunca reparamos que l’alternativa igual ye acabar cayendo en manes de los trésfugues y de los buscavides del sistema.
La democracia pa que furrule necesita que miremos pa ella. Que miremos mui bien a quien ponemos al frente del negociu común. Que miremos que la xente que quiera xestionar la cosa pública, valga pa ello. Pero, sobremanera, que procuremos que la xente que valga pa xestiona lo nuestro, quiera facelo.
Porque, repito, ye lo nuestro lo que tan caciplando.
0 comments:
Publicar un comentario en la entrada