Coles perres d’otros

Ye tremendo lo que ta pasando en Siero. El Tribunal de cuentes acaba condenar al alcalde actual, Juan José Corrales, del PSOE, y al alcalde anterior, Jose Aurelio Alvarez, del PP, a devolver setecientos cuarenta y picu mil euros al conceyu. Del so bolsu. Viendo esto, más de ún podría pensar que ye otru casu de corrupción; otru escándalu más d’alcaldes que meten mano na caxa común pal so provechu particular; otru pelotazu. Pero non.
Esa nun equí ye la cuestión. Equí nun se dio enriquecimientu personal de los alcaldes condenaos. Equí, en Siero, los setecientos cuarenta y picu mil euros aplicáronse a pagar aumentos salariales a los funcionarios municipales perriba de lo establecío pola llei presupuestaria. Vamos, lo que se diz una negociación del conveniu colectivu entusiasta.

Los alcuerdos tomáronse en plenu, nun hubo intención d’anubrilos, la decisión foi pública y notoria, con lluz y taquígrafos. Sí. Pero nun fue llegal. Había, inclusu, evidentes alvertencies de la interventora municipal y, col pasu los años, de distintes instancies xudiciales que lo recalcaben. Pero, a lo que se vé, nun se-yos fizo demasiao casu. Y agora toca devolver les perres.

Ye verdá qu’hai tiempu que se tan empezando devolver eses perres. Pero, pa qué nos vamos engañar, la cosa nun pinta fácil. De mano, a los fallecíos y retiraos, va tar complicao descontá-yoslu del sueldu. Y a tolos demás, nun sé cómo se va enfocar la cuestión de los intereses. En cualquier casu, esta sentencia y too esti culebrón del ayuntamientu de Siero, enseña a les clares la importancia de cumplir les regles de xuegu. La clave nun ye namás tener bones intenciones. Lo decisivo nun ye tampoco que naide proteste o que a naide perxudique lo que facemos de manera directa. Non. Lo fundamental ye qu’hai unes regles de xuegu que tenemos que cumplir. Somos servidores de la llei. Y el problema, el verdaderu problema, ye que siempre vemos una contradicción énte reglamentación y eficacia. Munchos alcaldes dicen que si tuvieren que cumplir con tolo que diz la normativa, nun podríen mover un déu. Y munchos otros aseguren que tan asumiendo un trenta por cientu de funciones que, en realidá, nun-yos competen.

Y, en fín, que por eso hai tantos problemes de financiación municipal.
Esta sentencia tendría que facenos reflexonar. Naide quier que los dos alcaldes imputaos tengan qu’arruinase y, por eso, les muestres de solidaridá son sinceres y xenerales. Pero la llei ye una cosa mui seria y hai que la cumplir siempre.

Y más cuando se ta mirando poles perres d’otros.