Llibertá y seguridá

La vida da munches vueltes y nun me digan que nun tien el so aquello ver a los independentistes del PNV pidiendo que l’exércitu español defenda a los atuneros vascos de los pirates somalíes nos mares del Índicu. Suena a otros tiempos y, en momentos graves como esti, onde lo principal ye ver cómo traer con vida a los trenta y seis secuestraos del atuneru Alakrana, ye onde munches tonteríes y xuegos de banderes, a los que somos tan aficionaos, algamen la so verdadera dimensión.

El mundu ye un llugar peligrosu. Y la costa este d’Africa, más. Por eso nun cuento que’l gobiernu español tenga actuao especialmente mal nesta cuestión. Más bien tengo la impresión que, como europeos y pacifistes que somos, mesmo los de dereches que los d’isquierdes, tol mundu queremos un exércitu pequeñu y baratu, pero mui modernu y mui bien equipáu; que nun tea ociosu y que nun intervenga en conflictos exteriores, pero que tea presente en cualquier llugar del mundu cuando lu necesitemos. Vamos, una cuadratura del círculu imposible de facer.

N‘esti casu concretu, y en coordinación cola Unión Europea, estableciérase un perímetru de mui relativa seguridá na costa somalí. Como digo, nun ye que, dientru d’esta ária, la seguridá tuviera garantizao dafechu. Por más medios que se tuvieren puesto, yera imposible cubrir tol aria d’influencia de los pirates. Pero ye evidente que, afuera d’esta ária, que, a lo que parez, nun respetaron los tripulantes del atuneru Alakrana, el riesgu yera tovía mayor. En fín. Agora la prioridá ta clara: resolver esta situación de la manera más sensata posible. Con serenidá y sentíu. Con eficacia. Pero, en pasando esto, nun yera malo entamar una reflexón colectiva del papel del exércitu, o de los exércitos europeos, nun mundu cada vuelta más pequeñu y onde nada, dengún conflictu nin territoriu, queda apartáu.

Una posibilidá yera embarcar infantes de marina nos barcos europeos; de pesca o mercantes. Pero que naide cuente cubrir el cien por cien de les negocios o intereses nuestros nel exterior. Y, amás, vamos topanos cola diferente lexislación en cada estáu. Francia y Italia contemplen esa posibilidá. España non. Por eso cuento que, independiente de cómo acabe esti secuestru, tenemos qu’aprender la llección: apautar unos mínimos, entender en qué mundu vivimos y concluir que la llibertá y la seguridá nun son incompatibles. Más bien tolo contrario: la llibertá y la seguridá precisen una de la otra. Porque la seguridá ensin llibertá nun val pa nada. Sí. Pero la llibertá ensin seguridá, directamente nun existe: queda secuestrada.