Echar contra los ricos ye fácil. Tomar midíes eficaces p’amenorgar les diferencies económiques y sociales nun lo ye tanto. Y, na mio opinión, nesta contradicción énte lo dicho y lo fecho descansa muncho d’esta última y cafiante reforma fiscal.
La suba d’impuestos presentárase hai unes selmanes como llimitada nel tiempu y gravosa namás que pa les rentes más altes. Y, hasta que supimos en qué diba consistir, podía gustanos más o menos la idea, pero tol mundu contábemos que diba ser asina. Inclusu caleciose l’ambiente falando de lo pernicioso que yeren les SICAV y de cómo los mui mui ricos pagaben namás un 1 % de les sos rentes de capital mientres el común de los mortales cotizábemos al 18 %. Palabrería; namás que palabrería. A poco qu’afondáremos, descubrimos que tolos fondos d’inversión coticen al 1 %. Lo mesmo da que seyan pa los grandes que pa los pequeños inversores. Y descubrimos que toles rentes de capital d’esos fondos ya cotizaron primero al IRPF al momentu de xenerase; y, una y vuelta los sos propietarios decidan retiralos, van volver a cotizar al 18 %. Lo de la doble o triple imposición, vamos. Pero, en cualquier casu, da igual. Tola polémica y los globos sonda de les SICAV y del restu los fondos d’inversión, quedaron pa práu y, al final, lo que va subir de verdá va ser l’IVA.
Nun me gusta facer discursos negativos y muncho menos dar la sensación d’opinar y actuar sigún esquemes políticos previos. Nun me gusta cargar contra’l gobiernu y menos en tiempos onde tomar decisiones ye tan difícil. Pero tenemos que llamar a les coses pol so nome y nun queda otro que dicir que, n’esta reforma fiscal, el gobiernu español mintió. Asina, con toles lletres, el gobiernu de Zapatero ta mintiendo.
Contradiciendo les sos propies palabres, esta reforma fiscal nin va ser llimitada nel tiempu nin va gravar namás a les rentes más altes. Nun va ser llimitada nel tiempu porque denguna de les midíes propuestes tien fecha d’acabación. Denguna tien fecha de cierre. Ye más: dalguna d’elles, empezando pela subida del Iva, aplaza’l momentu de la so entrada en vigor; pero, repito, denguna pon un plazu final explícitu. Toes son por tiempu indefiníu. Y respective a lo de gravar les rentes más altes, ustedes mesmos: ¿A quién grava más que-y suban un dos por cientu la cesta la compra, al banqueru o al chofer del banqueru?
El problema de facer demagoxa en cuenta tomar decisiones ye que, cuando nun queda otro que decidir, les palabres soltaes al aire terminen tornando encontra de ún.
0 comments:
Publicar un comentario en la entrada