Naide dixo que fuera fácil

Montserrat Nebrera acaba marchar del Partíu Popular de Cataluña dando un portazu. Nun ye la primera que lo fai y apuesto lo que quieran a que nun va ser la última. Alcuérdome agora de Juan Morales, Ricardo Costa o del propiu Sergio Marqués. Y, por descontao, ya sé que los cuatro casos qu’acabo mencionar nun tienen nada que ver énte ellos. Pero bueno, nun tienen nada que ver énte ellos quitando que los cuatro marcharon del PP siendo figures importantes dientru’l partíu. Demasiaes casualidaes como pa nun sacar conclusiones.

La política ye dura. Montserrat Nebrera perdió un congresu col cuarenta y tantos por cientu de los votos; una derrota de lo más digna. Pero un dignidá que nun-y valió el respetu de la dirección sinon tolo contrario. A Juan Morales pasó-y prácticamente lo mesmo y acabó sospechosamente igual: al añu y picu de perder un congresu internu, terminó marchando del partíu. Ricardo Costa nun perdió dengún congresu. Yera’l secretariu xeneral pero echáronlu porque-y pidieron un plus de responsabilidá que nun-y pidiríen si fuera un militante cualquiera. Lo que suena bien pero llama l’atención porque esi plus de responsabilidá nun-y lu pidieron, con más razón, al so superior inmediatu: al presidente del partíu, el señor Camps. Suponse que por respetu institucional, pero ye qu’esi respetu nun lu tuvieron col presidente Marqués al qu’echaron del partíu en mediu la lexislatura y, la verdá, tovía nun sabemos demasiao bien por qué.

En fín. Nun quiero qu’interpreten les mios palabres como un ataque a los partíos políticos a bultu. La política ye cruel y tien unes normes internes qu’hai que respetar. Una d’elles ye saber perder: si pierdes un congresu, perdiste. Y toca aguantar, tener paciencia y esperar meyor ocasión. Y si lu ganes tamién hai que saber ganar: integrar a los críticos o tirar p’alantre. Pero xugar llimpio en cualquier casu. Y tengo pa min qu’eso, la falta de regles clares que permitan saber a qué atenese, ye lo que más torga la captación y promoción de talentos dientru los partíos. Llistes abiertes, dicen dalgunos. Bueno, ye una idea, pero non la panacea. Miren si non lo que pasa nes elecciones al senáu, onde hai llistes abiertes pero la xente votamos a bloque. Primaries dicen otros. Val. Pero miren lo que-y pasó al señor Borrell, que les ganó nel PSOE o al señor Almunia que les perdió.

Regles de xuegu más clares. Saber perder y saber ganar. Y ser conscientes que la política ye un sistema imperfectu onde nos representa aquel al que los ciudadanos, o los militantes, voten. Naide dixo que fuera fácil.