Hai munchos tipos de lideralgu, munchos estilos de dirección, y el de Mariano Rajoy, presidente del PP, nun ye precisamente de los más vistosos. Pero, qué contra, si-yos tengo que ser sinceros, yo cada día lu entiendo meyor. Da la sensación que, como líder de la oposición, el señor Rajoy nun fai nada, dexa que los problemes s’arreglen o pudran solos y nun ye a dominar a la so tropa que parez que cada día se-y rebela un poco más. Pero, si miramos p’atrás, comprobamos que munchos de los que-y facíen solombra quedaron pel camín. Y los que-y la siguen queriendo facer anden tan enguedeyaos con otros asuntos que ya nun cuenten a la hora incordialu. Piénsenlo, alcuérdense d’Acebes, Zaplana, Costa, Camps, Gallardón, Aguirre, Jimenez-Losantos, o incluive Aznar...
Ye verdá qu’esta manera funcionar nun ye mui aquello, nun viste, nun desata pasiones. Y, asina, cola que ta cayendo, a Rajoy cuesta más de la cuenta que los sos niveles de popularidá suban. Efectivamente, Don Mariano nun arreciende a glamour, nun tien carisma, nun desprende magnetismu. Sí. Pero ehí sigue; de derrota en derrota hasta la victoria final. O seique non, porque bien mirao, él va faciendo los sos deberes, va cumpliendo oxetivos, va quemando etapes. Bien de vueltes aprueba raspiao; como nes elecciones gallegues o vasques. Pero, en xeneral, va ganando claramente les metes volantes, como nes europees. Y, cuando tien dalguna preba de verdá; como’l congresu del partíu en Valencia; imponse con rotundidá.
Rajoy ye, como digo, un líder tranquilu, previsible, ensin aristes. Pero eso, bien mirao, pue que nun seya tan malo. Existe dende hai tiempu una corriente d’opinión demasiao xeneralizada que pretende denunciar el secuestru de la nuestra democracia polos partíos políticos. O más bien pola cúpula d’ellos, por una minoría elitista, por una burocracia incompetente que nun val pa nada. Y que, p’acabar con ella, con esi despotismu desilustráu, solicita que’l protagonismu políticu se-y devuelva a la sociedá civil, a los líderes del pueblu. Unos líderes que casualmente van dicinos ellos quien son, y que van entender meyor que naide a la xente porque van facelo ensin intermediarios insitucionales. Yo, la verdá, como buen demócrata, lliberal y nacionalista que soi, considérome sensible a estos argumentos; ye tentador combatir a comuña al poder tiránicu, centralista y opresor. Pero, precisamente porque soi buen demócrata, lliberal y nacionalista, cada vuelta aprecio más la bondá de disponer de regles de xuegu clares y aburríes; d’instituciones nes que s’enfotar y de mecanismos claros de recambiu que permitan saber que’l xefe ye’l que ganó l’últimu congresu. Y menos demagoxes.
0 comments:
Publicar un comentario en la entrada