El públicu y lo público

Cualquier iniciativa, cualquier empresa, cualquier actividá humana que pretenda algamar dalgún reconocimientu social precisa del apoyu del públicu y del apoyu de lo público. Necesita del apreciu de los particulares y de les instituciones; del encontu de la xente y de les alministraciones. Y esa doble necesidá tenemos que la tener siempre presente porque la una alimenta a la otra y viceversa. Ye más: la una ensin la otra nun tien xacíu.
Lo público ensin el públicu nun tien sentíu, pero el públicu ensin lo público, tampoco. Una alministración ensin sociedá civil que la soporte nun tien sentíu; pero una sociedá civil ensin alministración que la dirixa tamién queda coxa.

Los premios Andrés Solar lleven venticinco años reconociendo’l llabor de bien de particulares y colectivos a favor del nuestru idioma. Ye un llabor emponderable que, como tolo que fai la Xunta pola defensa de la llingua asturiana, merez el nuestru respetu. Somos, incluso, parte interesada: esti mesmu periódicu recibió, al añu de la so fundación, el pegollu que simboliza’l premiu Andrés Solar con munchu arguyu. Y sentímonos hermanos de los otros venticuatro agraciaos que, n’esti tiempu, enseñaron el so compromisu y bon facer pa col nuestru idioma. El llistáu de particulares y colectivos que lo formen son una amuesa clara d’una sociedá civil viva y activa.
Pero, la Xunta pola defensa, al par que concede’l premiu Andrés Solar, tamién otorga otru: la madreña de purpurina. Un reconocimientu que, con un aquello d’ironía, señala a aquelles persones que destacaron nos sos ataques o desprecios al nuestru idioma. Y, ehí, la nuestra visión ye otra.

Hai venticinco años igual yera interesante rescamplar eses actitudes. D’aquella, cuando l’argumentu básicu de los contrarios a la normalización del asturianu yera qu’ellos nun reprimíen nada porque nun se podía reprimir una llingua que nun existía, igual tenía ciertu sentíu enseñar públicamente estes contradicciones y poner lluz onde nun había otro que silencios y censures interesaes. Pero agora les circunstancies son distintes. Agora, pasaos los años, ya nun se trata de señalar contrarios, sinon de ganar partidarios. Ya nun ye cosa de trazar rayes sinon de tender pontes. Ya nun ye plan d’agrandar conflictos sinon de ganar amigos. Por eso contamos que yera un bon momentu pa dexar de convocar el madreñazu; que, como ye obvio, casi naide recueye; y centrase nel pegollu. Superar lo negativo pa centrase no positivo.

Pero, amás, hai otru argumentu pa esti cambiu: y ye que, n’esti tiempu, la mayoría de los madreñazos llevolos la nuestra alministración, el nuestru gobiernu. Y eso, pongámonos como nos pongamos, nun ye equilibráu. Ye desproporcionáu: nun puede ser que por munchu que faigan les nuestres instituciones, siempre nos pareza poco. Nun ye la forma más intelixente de trabayar xuntos. Y necesitamos trabayar xuntos y a comuña.