Propuestes de futuru

Ta p’acabar otru añu y seique toca facer repasu. Pero más que mirar atrás traía más cuenta facer por albidrar el futuru; por proponer caminos nuevos. La crisis llegó pa quedase y l’añu qu’entra va ser complicáu. Hai recortes na economía familiar, hai recortes nos presupuestos de les empreses y hai recortes nes cuentes públiques. Uno y otro lleven a la mesma conclusión: va haber que mirar más el gastu. Y, n’esti contextu nuevu, de nós va depender poner los pocos o munchos recursos disponibles al serviciu de les propuestes más eficaces.

La eficacia, la eficacia nos resultaos va tener que ser, d’equí pa en delantre, el nuestru oxetivu principal. Nun se trata namás de cargase de razón; lo importante ye acertar. Y, n’esti sentíu, nel ambiciosu proyectu de la normalización del nuestru idioma, de les nuestres instituciones y de la nuestra cultura, dende Les Noticies aneciamos en siguir enfotándonos na utilidá de los medios de comunicación. Apostar por ellos ye sinónimu d’eficacia y d’aciertu.
El nuestru idioma, la nuestra cultura y les nuestres instituciones, tantes veces amatagaes puertes adientru, tienen que salir afuera y enseñase. Difusión y prestixu social, esa ye la idea. Y pa consiguilo, como dicimos, son imprescindibles los medios; tolos medios. Ye más, puestos a escoyer, nun tenemos reparu en destacar que’l futuru ha pasar pela televisión. Nel casu del asturianu, tan necesitáu de visibilidá, l’impactu normalizador que pue tener lo audiovisual nun se-y tendría qu’escapar a naide. Por dicir, la retransmisón continuada na televisión autonómica de partíos de fútbol nel nuestru idioma diba tener una eficacia social evidente, difícilmente comparable con nada. Tan evidente que nun tendríemos que dexar d’aneciar n’ello, por más que l’actual panorama nun invite a albidralos al curtiu plazu.
Otro tanto pasa colos informativos. El nuestru idioma necesita tresmitir seriedá, rigor y credibilidá. Y eso danlo los informativos.. El coste económicu diba ser, otra manera, inexistente: ente los periodistes hai profesionales suficientemente preparaos como p’abordar estos retos Y el beneficiu pal desarrollu del artículu cuartu del Estatutu, exponencial. Por too ello, si hai que concentrar esfuerzos, na nuestra opinión, estos dos campos nuevos; fútbol y telediarios; habríen ser prioritarios.
Depués podríen venir los doblaxes de películes o de series de ficción. O de documentales. O, inclusive, l’ampliación de la programación propia. Por idees nun diba quedar. Y si pensamos nel futuru más a llargu, la producción de series de ficción propies. En cualquier casu, lo importante, lo decisivo, ye pensar meyor ónde poner los esfuerzos pa que’l beneficiu resultante rescample. Y si contamos que lo importante ye la difusión, la promoción y el prestixu social, la repuesta ye clara: hai que comunicar meyor.