Renovar la política ye necesario

Acaba un añu marcáu pola economía y empieza otru qu’apunta más a la política. Nun ta claro la relación énte la una y la otra, pero lo que ye evidente ye que nun puen vivir al marxe la una de la otra. Nun pue existir denguna actividá económica razonable ensin unes instituciones publiques que marquen les lleis del mercáu; igual que nun pue haber denguna actividá política razonable ensin una economía próspera qu’alimente los presupuestos.
La discusión ya nun pue ser si hai crisis o quien tien la culpa d’ella. La cuestión agora ye cómo facemos pa salir d’esto, pa prosperar, pa crear empléu, pa competir. ¿Son los políticos la solución? Pues igual unos más qu’otros; eso ye evidente. Como ye evidente qu’ensin l’apoyu de la sociedá, ellos nun tienen nada que facer. Pero, en cualquier casu, la repuesta correcta ye “Sí”. Sí, por descontao: los políticos son la solución. El problema ye saber qué políticos, d’énte tolos qu’hai, son la solución meyor. O la menos mala.
La clase política tien mui mala prensa énte’l común de la ciudadanía. Falamos mui mal d’ellos, suspendémoslos por sistema nes encuestes d’opinión y dicimos, inclusu, que la mayoría lo único que quieren ye aprovechase del cargu pa robar. Lo que nun contamos ye que, igual, con esa actitú, nun facemos otro qu’alimentar el cinismu. Si la política ye una actividá indigna ¿pa qué la necesitamos? Y si la política ye una profesión pa xente ensin principios ¿quién va querer metese a ella? La cuestión ye que necesitamos xente qu’alministre con xeitu los nuestros bienes, derechos y deberes públicos. Y el problema ye que si nun nos preocupamos de qu’esa xente seya la meyor, esos puestos van acabar ocupaos por incompetentes.
Renovar los puestos y les persones ye un deber necesariu. Y a esi debate vamos asistir dafechu nel añu qu’entra. La derecha asturiana ta buscando candidatu y llama l’atención que la renovación pueda venir de la vuelta del señor Álvarez Cascos porque, de concretase, diba suponer un cambiu xeneracional pero al revés: sustituir un candidatu de 55 años por otru de 64. Pero, cuidáu, porque na izquierda asturiana les coses nun son tan estremaes: el Presidente Areces presentose la tercer vuelta con 64 años, pero el so posible sustitutu, el señor Javier Fernández, secretariu xeneral de la FSA, de facelo, diba estrenase con 63. ¿De verdá nun hai xeneraciones nueves dispuestes a garrar el relevu? Dalguna cosa tamos faciendo mal cuando nos quexamos tanto de la inmovilidá de la nuestra clase dirixente pero nun somos a abrir espacios nuevos a esa renovación.