Tiempos de cambiu

Son tiempos de cambiu. En realidá siempre lo son, pero esta fin d’añu, y casi de deceniu, ta aportando bien de novedaes que nun tendríemos qu’escaecer. Llevamos añu y picu de crisis y, anque ya empezamos a tar un poco fartos del conceptu, que naide s’enquivoque: vamos tardar en salir d’esta recesión. Y vamos tardar inda más n’escapar de los sos efectos.
Ente otres coses, falando del Gobiernu, estos van ser los primeros presupuestos realmente recesivos que va aprobar el nuestru parlamentu. Los primeros. Y ye normal, discursos aparte, a lo último nun queda otra salida que recortar: los ingresos caen, los gastos suben y la única manera de cuadrar les cuentes ye axustando les partides. Va haber descensos serios na mayoría de les conseyeríes y, d’equí pa en delantre, ye cuando se van enseñar les verdaderes prioridaes polítiques d’unos y d’otros. De los socios de gobiernu y de la oposición.

Nes families va pasar otru tanto, pero con una diferencia: los recortes empezaron muncho primero, cuantayá, y, agora, depués d’aquellos primeros sustos y de los primeros axustes rápidos, la xente ta comprobando cómo la vida sigue y la economía nun tien otro que s’acomodar a esti futuru inciertu. L’alarma va remitiendo, el miéu va pasando, nun se puede tar sollerte tol tiempu y asina, a diferencia de les pascues pasaes, ye probable que, n’esti avientu, repunte un poco’l consumu. Un poco d’alegría nel gastu, que tampoco yera malo.

Pero, cuidáu, les coses ya nunca van volver a ser como primero. La pómpara españó y naide la va reconstruir. Agora l’escenariu ye otru. Como ciudadanos, vamos tener qu’aprender a maurecer nes nuestres relaciones cola alministración. Yá nun son l’enemigu fácil énte’l que protestar, más bien lo contrario. Tampoco son los encargaos de sacanos les castañes de nengún fuéu. Non. Son, únicamente, los nuestros representantes: funcionarios d’altu nivel a los qu’escoyimos pa poner orde y mirar que toles partes (incluyendo nosotros mesmos) cumplamos unes regles del xuegu comunes. Que vixilen que naide faiga trampa y, asina, que permitan que rescample’l que más méritos faiga. Eso como ciudadanos. Y, como consumidores, nun nos tenemos qu’enquivocar: vamos tener qu’aprender a valorar más el coste de les coses. Porque, gratis, lo que se diz gratis total, nun hai nada. Nada nuevo: los medios sabémoslo bien pero, d’equí pa endelantre, vamos tener que movenos meyor y tomar decisiones rápides pero con xeitu nun futuru cada vuelta más abiertu.

Lo dicho: son tiempos de cambiu y, como siempre, va haber que siguir adaptándose a ello.