El desastre d’Haiti ximielga la nuestres conciencies de manera descomanada. La selmana pasada comentábemos les incomodidaes que suponía una nevadona que torgaba les comunicaciones y enseñaba la nuestra falta previsión o disciplina. Qué lloñe, qué superficial, qué egocéntricu queda too eso agora. Pasen los díes depués del terremotu en Puertu Príncipe y la traxedia de los haitianos dexa pasu a la desesperanza.
El desastre apodrez: nun hai techos, nun hai comida, nun hai melecines, nun hai gobiernu. La voluntá de los ciudadanos y de les alministraciones occidentales d’ayudar a la xente haitiano rescampló dende’l primer momentu. Millones d’euros en donaciones y recursos; medios humanos y materiales. Pero nun basta. Nun basta namás con recaldar cooperantes y fondos; cosa importante otra manera; porque lo decisivo agora ye ser quien a apurrilos al sitiu adecuáu nel momentu adecuáu: a los que lo precisen agora mesmo. Y eso pinta mal, pinta mui mal.
Al desastre de los saqueos, los motines y la violencia de los desesperaos y de los abusones locales, nun podemos sumar agora la pelea de los países y les organizaciones internacionales. Estaos Uníos desembarca diez mil marines pa garantizar la seguridá y Francia y Brasil critiquen qu’eso, más qu’una misión d’ayuda humanitaria, parez una ocupación militar. Faise difícil entendese n’esti llinguaxe de la cosa bélica: nuna guerra como la de Bosnia o Afganistán, dicimos que los soldaos van en “misión humanitaria”; pero nun desastre humanitariu como’l d’Haití, tarrecemos qu’asemeye “una ocupación militar”. En cualquier casu, lo primero nun ye perdese en discusiones inútiles o teóriques. Y; anque la mitá se pierda pel camín y, anque con más tiempu y previsión, la eficacia diba multiplicase; lo fundamental agora ye facer que l’ayuda llegue.
Nun hai gobiernu n’Haití. Nun hai autoridá, nun hai alministración. Y, en momentos como ésti, onde lo decisivo ye tomar decisiones doloroses, échense en falta cabeces visibles y mentes valientes. La decisión que tuvo que tomar hai poco un equipu de rescate español enseña bien a les clares lo enguedeyao de la situación: taben a piques de rescatar una neña d’embaxu los escombros cuando empezó un tirotéu. Pidieron media hora más a los soldaos, namás media hora; pero nun pudo ser: “Vosotros decidís, ye la vuestra vida o la d’ella”. Y, anque resistieron unos minutos más, a lo último tuvieron que marchar. Poques coses pue haber más frustrantes qu’esa: dexar otra víctima más cuando’l rescate empezaba tocase cola punta los deos.
La voluntá d’ayudar nun basta. Ye fundamental, pero nun basta. Y, porque nun podemos echar la culpa a los desesperaos precisamente d’eso: de caer na desesperanza, esti ye’l momentu de l’acción.
0 comments:
Publicar un comentario en la entrada