Seis mil empresarios como Pepe’l Ferreiro

Hai setenta y cinco mil paraos n’Asturies. La media de trabayadores por negociu nel nuestru país ta alredor de les doce persones contrataes por empresa. Echando unos númberos rápidos la conclusión ye fácil: precisamos crear unes seis mil y picu empreses nueves pa xenerar empléu pa esos setenta y cinco mil paraos. Dicho d’otra manera: necesitamos seis mil empresarios más n’Asturies; seis mil nuevos emprendedores. Necesitámoslos como’l comer. Eso pamidea ta claro. Pero... ¿Querémoslos? Y, bueno, yo tengo pa min que non; que nun los queremos.

Emprender cualquier actividá tien grandes satisfacciones, pero tamién grandes riesgos. Ún d’ellos, y seique de los peores, ye’l de la ingratitú. El fracasu penalízase n’excesu y cuando una empresa pieslla casi naide lo ve como lo que ye: como una de les dos posibilidaes del riesgu. N’apostando pol riesgu, existe la posibilidá del fracasu y eso nun tien por qué ser, necesariamente, culpa de naide. Pero eso nun ye lo peor. Lo peor ye que n’esti país nuestru, tan particular, tamién penalizamos n’excesu l’éxitu. Y, asina, cuando una empresa triunfa, y llega inclusu a consolidase, somos cicateros a la hora valorar los méritos de los responsables. Nun los reconocemos y miramos namás pa les carencies qu’enseña’l proyectu, pa los defectos qu’arrecostina nes formes y pa les tensiones humanes que xenera alredor. Y nun nos decatamos que, a la hora valorar cualquier actividá humana, nun la podemos comparar col prototipu ideal de la perfección sinon cola verdadera alternativa a la so existencia: la nada. La verdadera alternativa a una empresa o a un proyectu existente nun ye l’ideal de perfección. Ye la nada.

Pepe’l Ferreiru emprendió hai años una aventura imposible: entamar nel occidente asturianu un muséu que caltuviera y enseñara’l so patrimoniu etnográficu irrepetible. Pañar los trastos vieyos, inventariar los oficios tradicionales y sacar la cultura tradicional de la tená pa enseñala nuna sala d’exposiciones viva; ésa yera la so visión. D’aquella naide daba un duru por ello y namás la necedá d’esti emprendedor terminó tresformando un suañu improbable nuna realidá rentable y evidente: el Muséu Etnográficu de Grandas de Salime. Una realidá que xeneró empléu, dinamizó la economía local y algamó superavit na cuenta d’explotación. Pero los defectos pesaron más que les virtudes y, esta selmana, a dos años del so retiru, acaba alcordarse’l so relevu como director. En palabres de la Conseyera de Cultura: “énte la serie de problemes que tan faciendo que funcione mal y l’incumplimientu de les funciones que tou muséu tien encomendaes por llei”.

¡Qué pena, qué desastre, cuánta ingratitú! ¿De verdá que nun podíen haber esperao dos años? En fin: esti ye'l país que tenemos.