El paripé

La política tien muncho de paripé. De manexu de símbolos y de tiempos. Hai una frase que repiten bien de responsables públicos cuando se-yos pregunta por asuntos incómodos y que, con variantes, vien a dicir dalgo asina como: “non, eso agora nun toca”. Poque, efectivamente, decidir qué asuntos formen o nun formen parte de l’axenda mediática ye ún de los trabayos principales de los nuestros dirixentes.

Por eso, cuando hai unes selmanes, el gobiernu español planteó la necesidá de reformar el sistema de pensiones, les interpretaciones fueron estremes. Habíalos que contaben que, por fín, un gobiernu yera quien a tener una visión a llargu plazu. Nun se trataba de tomar decisiones pa la lexislatura en cursu; tratábase más bien de reflexones a diez, quince o venti años: un exerciciu de responsabilidá. Bien. Por contra, otros argumentaron que lo único que se buscaba yera meter miéu: énte un escenariu de crisis y axustes, poques coses preocupen más a la xente qu’amenazar cola bancarrota de les pensiones. Y un pueblu acobardáu, acepta meyor los recortes. Yo, na mio opinión, cuento que ye too muncho más simple. Y más precupante, otra manera. Tengo pa min que la iniciativa de sacar esti tema a l’axenda nun vino de Moncloa: vino d’Europa. Preocupaos por xustificar a Bruseles les cuentes públiques y queriendo enseñar que se taben tomando midíes d’axuste, el gobiernu español introdució nun informe a la Unión la idea d’aumentar los años cotizaos y d’atrasar la edá de retiru. Y, entós, armose la de coyer.

Armose la de coyer porque eso, agora, nun tocaba. Pero ya yera tarde. Carta na mesa presa y, por muncho que, a les poques hores, intentose dicir que lo del informe nun yera namás qu’una “idea”, la cuestión españó. Queriendo facer de la necesidá virtú, dalgunos dirixentes propusieron tirar p’alantre: ya de perdíos, al ríu. Pero, como manda el que manda, terminó imponiéndose la llei del paripé: intentar contentar a tol mundu pa nun contentar a naide. Y eso ye exactamente lo que ta pasando: que ta tol mundu enfadáu pero nun hai nada resueltu.

Los sindicatos ya teníen agora la escusa que buscaben pa convocar movilizaciones. Pequeñes, pa qué nos vamos engañar. Pero suficientes pa que naide diga que nun fain nada. Y la oposición, otra vuelta de tuerca más pa enseñar la falta de valentía d’esti executivu a la hora tomar decisiones. Un desastre. Y entós, pa terminar de rematala, llega la teoría del pautu: echaime una mano, que nun se trata d’ayudar al gobiernu, trátase d’ayudar a España. A buenes hores.