Los militantes nun deciden gota

El problema de nun tener un sistema abiertu y tresparente pa la elección de candidatos ye que’l so llugar acaben acutándolu los rumores y les operaciones palaciegues. Y nun me val l’argumentu de la discreción, o de la llavandería de trapos puercos en casa, porque nun hai nada más indiscretu qu’una conspiración. Y preba de lo que digo ye que nesta selmana vimos cómo s’enseñen impúdicamente; ello ye, nos medios de comunicación; les indirectes d’unos y otros pa ver de colocar les sos cabeces de cartel.

Nes files socialistes, la estratexa del aparatu pa presentar en sociedá al so nuevu candidatu, Javier Fernández, secretariu xeneral de la FSA, foi reveladora. Nun dicíen que yera l’aspirante. Dicen que ya dixeron hai meses que lo yera. Que ya-y lo dixeron al presidente Areces y, sobremanera, que ya lo sabíen en Madrid. Coses imposibles de contrastar (nin falta que fai) porque, tanto nun casu como nel otru, refierense a conversaciones internes. A min too esto recuérdame la estratexa adolescente de dir soltando indirectes del tipu: “Prestábame marchar de campamentu, pero, bueno, ya falaremos d’ello”. Pa depués, confirmar: “Bueno, marcho de campamentu que cuantayá que lo tenemos falao”. Nun hai debate, polo tanto. Nin lu va haber. ¿Pa qué? Si, una y vuelta se filtra a los medios, ya nun val la marcha atrás. De nada-y va valir, entós, al señor Areces enseñar agora un currículu de cinco victories electorales consecutives. Ya ta condenáu; públicamente condenáu.

Nes files populares el panorama nun ye mui otro. La teoría ye que la discusión de quién va ser el candidatu nun se va abrir oficialmente hasta la seronda. Y al que s’adelante y enseñe les sos cartes, echámoslu de la carrera (como-y pasó, por exemplu, al señor Aristegui). Esa ye la teoría. Pero la realidá ye que pela vía indirecta, y siempre per persona interpuesta, sigue y sigue’l ruxerrux sospechosu qu’anecia y anecia cola vuelta del señor Cascos.

¿Por qué nun se respeten los tiempos y les formes? ¿Por qué nun hai un sistema d’elecciones internes abiertu? ¿Por qué sigue tando mal visto afirmar que s’aspira a un cargu públicu? Pues, na mio opinión, porque ye too una gran mentira. Porque nun hai tiempos nin formes que respetar. Y lo que ye peor, porque los militantes nun pinten nada. La única regla d’oru ye contar col apoyu de la dirección, de la cúpula, de los burócrates, del aparatu. Esa ye la única verdá de la nomenclatura política asturiana.

Y el restu son maniobres de salón.