Trabayar hasta los sesenta y siete

Yo ya tengo asumío que voi trabayar, y cotizar, hasta polo menos los setenta años. Y nun me parez mal; parezme inevitable. Entiendo, polo tanto, que se plantee agora esti debate d’atrasar la edá de retiru y que, polo menos esta vuelta, alministración y ciudadanos seamos quien a tomar midíes valientes a llargu plazu.

Nun ye namás cuestión de voluntá: ye cuestión de perres. A primeros del sieglu pasáu, cuando s’inventó la seguridá social y s’afitaron los sesenta y cinco años como edá de retiru, la esperanza media de vida yera de setenta años. Eso, polo tanto, suponía cinco años de cobru de pensión por términu mediu. Pero angüañu’l periodu mediu d’espectativa de cobru de pensión ya nun ye de cinco años. Ye de diecisiete. Y eso, ensin contar, toles prexubilaciones y incapacidaes que vinieron adelantando’l pasu masivu de cotizantes a beneficiarios. Si a eso-y sumamos que la expectativa de vida va a más, la desproporción ente lo cotizao y lo recibió esbarrumba’l sistema.

Esos son los númberos. De nun facer cambios, les cuentes nun salen y, precisamente, pa facer sostenible l’estáu del bientar, p’apostar por él, ye imprescindible reformalu. Les coses cuesten perres y esa milonga de qu’esta crisis díbemos arreblagala “ensin coste social” empieza enseñase como lo que ye: una falsedá. A lo primero, negamos la propia existencia de la crisis. Depués echamos la culpa a los especuladores de Wall Street. Y más tarde recurrimos al déficit. En tolos tres casos, la cosa quedaba lloñe, nun nos afectaba, yeren cuestiones de macroeconomía. Pero entós empezamos a tocar los impuestos: primero quitando los famosos cuatrocientos euros, depués modificando tramos del IRPF y, a lo último, subiendo l’IVA. Y, en fín, eso ya empieza poder contase en perres y afectar a la nuestra economía personal o familiar. Pero siempre preferimos pensar qu’eso de los impuestos va afectar más a los otros y que ya nos arreglaremos. Hasta que llega esto de la xubilación; de la obligación de tener que trabayar, y cotizar, dos años más pa empezar a cobrar la pensión dos años más tarde. Y eso ya resquema. Dos años más. Dos años más de trabayu, venticuatru meses ún detrás del otru. Calculen, calculen cuantes perres y cuántes hores d’esfuerzu vamos aportar más a les arques publiques y compárenlo cola afirmación de qu’esta crisis nun va traer recorte de les prestaciones sociales. Tururú.

Esi ye, de momentu, el coste real d’esta crisis y del caltenimientu del estáu del bientar. Y el problema ye que siguimos tomando les decisiones a la defensiva “cuando nun queda otru remediu” envede ser valientes y facer les reformes necesaries pa salir d’esto.