Cascos amaga con volver. Y digo amaga porque’l señor Alvarez Cascos nun termina d’enseñar les sos verdaderes intenciones de presentase, o non, como candidatu popular a les vinientes elecciones autonómiques.
Da pistes, opina n’artículos sueltos, recibe apoyos de los militantes, come con unos y con otros, posa pa les semeyes y nun fai declaraciones. Y bueno, nun hai que ser mui espabiláu pa decatase que, too xunto, ye una manera intelixente d’allanar el camín a una posible candidatura.
¿Por qué nun la fai oficial ya? ¿A qué ta esperando? ¿A quién-y tien miéu? Bonu, nun creo que’l señor Cascos tenga miéu a nada. Pero si cuento, na mio humilde opinión, qu’hai una serie d’elementos que tan condicionando la so estratexa en tiempos y formes. Lo primero ye que hasta pasao’l veranu nun va haber nada definitivo. Va ser entós cuando la dirección nacional decida. Y, polo tanto, forzar agora’l debate ye mete-y priesa a la persona a la que menos-y gusta la presión del mundu: al señor Rajoy. Asina que, tranquilidá. Lo segundo ye que nun hai por qué enseñar gratuitamente les cartes al enemigu. Y nun me refiero a los enemigos de dientru’l Partíu Popular (que los tien y munchos) sinon a la otra candidatura: a la socialista. Una candidatura que tamién ta por definir y ónde nun ta gota claro si’l cabeza cartel va ser Vicente Areces o Javier Fernández. Asina que, como ye natural, el señor Cascos, prefier saber quién va ser el so contrincante primero de tirase a la piscina. Y, tercero, que ya puestos, tampoco pasa nada por poner nerviosos a los presuntos competidores de dientru’l Partíu Popular asturianu. Un partíu nel que tol mundu ye mui críticu colos dirixentes, pero ónde cuesta muncho enfrentase al sector oficial porque la disidencia, envede vese como debate constructivu, suel pagase col destierru. Y asina, ya verán ustedes como, énte la prespectiva de que vuelva Cascos, mui pocos van atrevese a ser abiertamente críticos con él: conocen el preciu de tar nel bandu perdedor.
El señor Cascos nun pue permitise perder. La ilusión que xenera la so candidatura ye la expectativa de ganar; de ganar por mayoría absoluta. Nun ye, polo tanto, un problema de renovación, nun ye un asuntu de democracia interna, nin siquiera ye una cuestión de poner orde en casa. Non. Lo que quieren los militantes populares ye ganar. Ganar les elecciones. Y eso nun ye malo, esa ye la misión de cualquier partíu políticu. ¿Ye Cascos el meyor candidatu pa esi propósitu o hai otros? Nun lo sabemos.
Y la pena ye que nunca lo vamos poder discutir de manera abierta y democrática.
0 comments:
Publicar un comentario en la entrada