El derechu a discrepar

Los qu’apostamos pol pluralismu y la llibertá d’opinión tenemos una oportunidá interesante de poner a preba los nuestros principios. L’eurodiputáu popular Jaime Mayor Oreja acaba afirmar que “los proyectos de Zapatero y ETA son aliaos potenciales pa les dos vinientes cites electorales: les del 2011 y les del 2012”; y que ETA “va ayudar al presidente del gobiernu a ganar les elecciones a cambiu de tar nos ayuntamientos vascos”.

Estes afirmaciones constituin, na mio opinión, una barbaridá, . Pero una barbaridá que tien que facenos pensar y confirmar si, efectivamente, el señor Oreja tien derechu a caltener y pronunciar llibremente o si valía más que callara. Pues bien, yo cuento que sí: que’l señor Oreja tien derechu a opinar ési despropósitu.

Nun tol mundu piensa igual. Les reacciones a les sos declaraciones vinieron bien llueu. Y fueron contundentes. Hubo quien les clasificó de “miserables”, “inadmisibles” y “irresponsables”. Y, en consecuencia, pidió al presidente del so partíu que “les desmintiera” y “les desautorizara ya”.

Bien de veces protestamos porque ye la partitocracia la que tien secuestráu al sistema democráticu. Porque’l que se mueve, y opina llibremente, nun sal na semeya. Ello ye, que’l que discrepa nun repite nes llistes electorales. Y porque, a lo último, la política y los parlamentos acaben llenándose de fieles y disciplinaos militantes que nun fain otro que votar y opinar siguiendo la voz del so amu. Pero, qué raro: en cuantes sal una voz discrepante, pidimos uniformidá, toque de xiblatu, prietes les files y boques callaes.

Personalmente, siempre conté que’l señor Mayor Oreja yera un políticu un tanto sobrevaloráu. Ye verdá que tien una apariencia de señor respetable, de xestor eficaz y de persona sensata. Pero, detrás d’esa apariencia, hai dos coses que nun me terminaron nunca de casar. Una, que la so única llínia de pensamientu yera la cuestión antiterrorista. Casi nunca lu ví ocupase d’otru tema que nun fuera ési. Y dos, que siempre enfocó ési únicu tema de manera mui plana, mui unívoca, ensin matices. Siempre repitió la mesma tesis. Y ye verdá que bien de veces tuvo razón. Pero eso nun quier dicir que’l so procedimientu d’análisis y valoración de la realidá fuera especialmente acertáu. Non. Un reló qu’adelante o qu’atrase, anque seya unos minutos namás, nunca termina d’acertar. Pue valinos de referencia, pero nunca termina de ser precisu. Por contra, un reló paráu termina dando la hora exacta, polo menos, dos veces al día.

Y por eso, porque discrepo abiertamente de lo que diz el señor Oreja, defendo’l so derechu a expresalo llibremente.