Llistes de competencia o de rellenu

Tol mundu conoz ya lo que-y pasó al alcalde de Siero. Ya saben: la nueche de comadres tuvo un accidente col coche oficial, travesó una glorieta pel mediu y dió positivu nel control d’alcoholemia. Total qu’acabó dimitiendo. Pero, como digo, nun quiero centrame agora no de siempre.

Sigo pensando que pudo pasanos a cualquiera y que la meyor llección que podemos sacar d’esto ye nun amestar nunca alcohol y volante. Lo que m’interesa agora ye lo que ta rescamplando a cuenta la sustitución del alcalde. En poques palabres, la cosa ye que, pa escoyer sustitutu, el saliente propunxo al númberu seis de la llista. Al númberu seis. Arreblagó, polo tanto, perriba’l númberu dos, y el tres, y el cuatro, y el cinco. Y nun lo fexo por caprichu o por improvisación. O por despreciu a los cuatro mencionaos. Tolo contrario: el candidatu númberu seis ya yera’l que venía siendo l’alcalde en funciones cuando llegaben les vacaciones, les baxes o otres ausencias del titular (agora mesmo, por exemplu); el que controlaba tolos asuntos internos del ayuntamientu y, en definitiva, l’home nel que s’enfotaba’l rexidor nos momentos más delicaos. Por dicir: el primeru al que llamó, a les cinco la mañana, cuando tuvo l’accidente.
Y nun yera l’unicu. En Siero, el PSOE gobierna en minoría y precisa de los votos, ente otros, del PINSI (Partíu Independiente de Siero) p’algamar la mayoría. Pues bien, la cuasi única condición que punxo’l PINSI pa nomar un nuevu alcalde socialista ye que fuera precisamente’l númberu seis de la llista. Non el dos, nin el tres, nin el cuatro, nin el cinco. Non. Tinía que ser el seis. Y a la FSA parecio-y bien tamién. Colo que tol mundu contentu. Bonu, tol mundu contentu pero había un detalle pequeñu que nun se podía arreblagar. Y ye que la llei ye mui clara: en casu de sustitución del alcalde, el so asientu tien qu’ocupalu’l númberu dos de la llista. A nun ser, claro, que renuncie. N’esi casu, entra’l númberu tres. A nun ser, claro, que’l númberu tres tamién renuncie… Y, bonu, ya m’entienden: que los cuatro conceyales aludíos tiníen que firmar un papel pa dexar buecu al escoyíu.
Y pasó lo que tinía que pasar: que dos d’ellos nun quixeron firmar y que, de manera fulminante, el propiu PSOE acaba d’echalos. La de coyer; naide sabe ya cómo va acabar esto. Pero, eso sí, una cosa ta mui clara: les llistes a conceyales hai que les ellaborar pensando nos méritos de los componentes porque cuando se fain de rellenu pasa lo que pasa.