La candidatura d’Uviéu a capital europea de la cultura ta siendo un despropósitu. Empezó mal, mui mal. Y d’entós p’acó vamos a peor. Voi intentar desplicao: cuando les tres ciudaes asturianes fueron a Madrid a presentar la so candidatura conxunta; ya saben, Xixón, Uviéu y Avilés, les tres en comandita; recibieron la primer xostrada. Resulta que, talo como consta na documentación oficial, nun s’almiten candidatures conxuntes.
Tien que ser una ciudá la que figure como demandante y, eso sí, nun hai nengún problema pa que otres ciudaes l’apoyen. ¿Y la Cuenca del Rhur, n’Alemania, que yera’l modelu trunfador nel que se quería basar la candidatura asturiana? Non, la candidatura de la Cuenca del Rhur en realidá ye la candidatura d’una ciudá (qu’agora, la verdá, nun m’acuerdo cuala ye) apoyada por otres ciudaes y pol restu la comarca. Primer problema, entós.
Primer problema porque los responsables del gobiernu asturianu que xestionaron esta primer fase de la presentación de la candidatura nun s’atrevíen a confesar el so error de bultu: que nun tiníen mirao la convocatoria col procuru suficiente. Pero, bueno, como nunca llovió que nun abocanara, les tres ciudaes apautaron entós mesmo que nun había nengún problema en qu’Uviéu figurara como titular y les otres dos ciudaes como añadíes. Colo que la vergoña pasaba a segundu planu y primer problema resueltu. Pero vino’l segundu problema: porque ya que yera Uviéu la candidata, lo menos que se podía facer yera entamar, d’equí pa en delantre, les coses a la so manera. O seya que nada de pagar a una consultora externa y nada de ceder protagonismu a l’alministración autonómica. Y, bueno, val, aceptamos pulpu como animal de compañía.
Pero, ai amigu, llegó’l tercer problema: porque resulta que lo que realmente quería Uviéu; o, muncho meyor, el so alcalde; yera nun presentase. Y si hasta esi momentu dexárase arrastrar de manera pasiva, agora que-y tocaba figurar en primer llínia, nun taba pol llabor de facer de motor. Asina que adiós a la candidatura y acabose. Ya saben ustedes cómo se resuelven estes cuestiones. Pero la hestoria nun acabó ehí y llegó’l cuartu problema (si ye que nun perdí ya la cuenta). El cuartu problema ye qu’Uviéu ya nun podía renunciar a la candidatura porque les espectatives yeren públiques y la ciudá taba quedando como la mala la película. ¿Solución? Cambiamos al titular y siguimos p’alantre. Pero, claro, lo del borrón y cuenta nueva ya nun val. Una pena: la cosa ta suficientemente enguedeyada como pa que lo que prometía ser un proyectu ilusionante acabe siendo un despropósitu detrás d’otru. Otra vuelta.
0 comments:
Publicar un comentario en la entrada